Uyu muryango wari ugizwe n’ibihugu bitanu byari byarishize hamwe kugirango birwanye imitwe y’abajihadiste mu karere ka Sahel.
G5-Sahel yashinzwe mu 2014. Yari igizwe n’ibihugu bya Moritaniya, Cadi, Burkina Faso, Mali na Nijeri. Ubufaransa bwari buyifitemo uruhare runini.
Ku wa gatandatu w’icyumweru gishize, Burkina Faso na Nijeri batangaje ko bawuvuyemo. Mali yo yari yarasohotsemo mu 2022. Hari hasigayemo rero Cadi na Moritaniya bonyine. None nabo, mu itangazo rimwe bashyize ahagaragara, ko bagiye gukurikiza ibikubiye mu ngingo ya 20 y’amasezerano-shingiro ya G5-Sahel.
Iyi ngingo ivuga ko umuryango ushobora guseswa biramutse bisabwe byibura n’ibihugu bitatu mu bawugize. Mu by’ukuri, biriya bihugu bitatu byarangije gusohokamo ntibisaba bitomoye ko umuryango useswa. Ariko na mbere na kare G5-Sahel yamye ijegajega.
Mu 2017 yashinze umutwe w’ingabo umwe wo kurwanya imitwe y’abajihadiste, nyamara ntacyo wagezeho. Ahubwo ubwicanyi bwariyongereye, bukomeza guhitana abantu ibihumbi n’ibihumbi. Abandi amamiliyoni babaye impunzi.
Abahanga bemeza kandi ko G5-Sahel yabaye imwe mu mpamvu z’akaduruvayo ka politiki, bakurikije kudeta zabaye muri Mali mu 2020, muri Burkina mu 2022, no muri Nijeri mu kwa karindwi gushize. None ahubwo mu kwezi gushize batangaje ko bibumbiye hamwe, bavuga ko bagiye gushinga leta zunze ubumwe zabo bwite. (AFP)
Forum