Igisirikare ca Ukraine catangaje ko Uburusiya bwakoze ibitero bitari bike bikoresheje za drone na misile mu ntara 4 zo muri Ukraine mw'ijoro ryashiriye uno musi ku wa kane.
Yamara abategetsi ba Ukraine batangaje ko nyinshi muri izo drone n'izo misile vyasambuwe n'ibikoko birasa indege na misile vy'ico gihugu.
Uburusiya bwarashe drone na misile 17 mu bibanza birimwo inyubako, abasivile, hamwe n’ibibanza vya gisirikare mu ntara za Donetsk, Mykholaiv, Sunny, Dnipropetrovsk na Zaporizhzhia.
Igisirikare ca Ukraine catangaje ko drone zitatu na misile irasa kure vyasambuwe n’inteko za Ukraine. Nta makuru y’abahasize ubuzima canke abakoremetse yatangajwe.
Ku musi wa gatatu, abategetsi mu bumanuko bwa Ukraine batangaje ko misile y’Uburusiya yasambuye ikibanza kibamwo abasivile. Abantu batari musi ya babiri barahasize ubuzima. Ubushikiranganji bw’intwaro yo hagati muri Ukraine bwatangaje ko misile yasambuye imangazini y’ibifungurwa mu ntara ya Mykolaiv.
Bulamatari w’iyo ntara, Vitaliy Kim, yatangaje ko ico gitero cakozwe mu mihana
y’ahitwa Stepove. Cononye inyubakwa zibamwo abasivile n’ikibanza gikorerwamwo imirimo ijanye n’uburimwi.
Iyindi misile y’Uburusiya yarasambuye inyubakwa ibamwo abasivile mu ntara ya Zaporizhzhia mu masaha ya kare yo ku musi wa gatatu. Prezida wa Ukraine, Volodymyr Zelensky, mw’ijambo yashikirije mw’ijoro ryo ku musi wa gatatu, yatangaje ko ico gitero cahitanye abantu batanu, gikomeretsa abandi nk’abo
Umushikiranganji ajejwe itwaro yo hagati wa Ukraine, Ihor Klymenko, yatangaje ko ikindi gitero c’Uburusiya cahitanye umupfasoni, gikomeretsa abandi bantu bane mu ntara ya Dnipropetrovsk. (VOANEWS)
Forum