Abo bagabo batwaye abanyenshurikazi batanu babakuye kuri kaminuza yo muri Leta ya Katsina mu majyaruguru y’uburengerazuba bw’igihugu, kuri uyu wa gatatu, nk’uko polisi yabivuze. Ni incuro ya kabiri haba igikorwa nk’icyo kivugwamo abanyeshuri muri ako karere, mu kwezi kumwe gusa.
Gushimuta hagamijwe ingurane bikunze gukorwa n’uduco dufite intwaro mu majyaruguru y’uburengerazuba bwa Nijeriya bitewe n’ubukene bukabije, ubushomeri n’itungwa ry’intwaro mu buryo bunyuranyije n’amategeko ryakwirakwiriye.
Umuvugizi wa polisi muri Leta ya Katsina, Abubakar Sadiq, mw’itangazo yavuze ko iryo shimuta ryabaye mu gitondo cyo kuri uyu wa gatatu, kuri kaminuza ya Leta mu mujyi wa Dustin-Ma.
Yagize ati: “Polisi yohereje uburyo bwose bushoboka hagamijwe gutabara abashimuswe badakomeretse”. Yongeyeho ko umwe mu bakekwa, yamaze kugera mu maboko ya polisi.
Kw’itariki 22 y’ukwezi kwa cyenda, abanyeshuri b’abakobwa byibura 24, barashimuswe ubwo bari kuri kaminuza ya Gusau, muri Leta ya Zamfara. Muri abo, 16 barabohojwe iminsi itatu nyuma yaho, yakurikiye operasiyo z’ubutabazi z’ingabo zishinzwe umutekano. (Reuters)
Forum