Iperereza rya ONU ku marorerwa akomeje kubera muri Etiyopiya, riri hafi guhagarara, nyuma y’uko uyu muryango ku rubuga rwawo rwa interneti, kuri uyu wa gatatu, ugaragaje ko nta cyasabwe ngo ubwo bushakashatsi bwongererwe igihe.
Komisiyo mpuzamahanga y’inzobere ku burenganzira bwa muntu kuri Etiyopiya, yashyizweho n’akanama ka ONU k’uburenganzira bwa muntu mu mwaka wa 2021, nyuma y’uko umuryango w’ubumwe bw’uburayi ubisabye, kandi uvuga ko intambara n’ibyaha byibasiye inyoko muntu bikirimo gukorwa muri Etiyopiya.
Ariko abanyafurika bakomeye basa n’abadashaka ko habaho indi manda, nk’uko abadipolomate babivuze. Iyo manda yaherukaga kuvugururwa mu mwaka ushize.
Lucy McKernan wo mu muryango Human Rights Watch, ushinzwe kugaragaza umurimo w’akanama k’uyu muryango n’indi miryango ya ONU yita ku burenganzira bwa muntu. Avuga ko ‘kutagira umwanzuro ari agahomamunwa imbere ya raporo y’impuguke imaze gushyirwa ahagaragara’
Abantu babarirwa mu bihumbi barapfuye mu myaka ibiri y’ubushyamirane hagati y’ingabo za guverinema n’iz’intara ya Tigreya, intambara yarangiye mu mpera z’ukwezi kwa cyenda mu mwaka ushize. Impande zombi ziregana gukora amarorerwa, harimo ubwicanyi, gufata abagore n’abakobwa ku ngufu no gufungira abantu ubusa. Cyakora buri ruhande nanone rukana rwivuye inyuma, uruhare mw’ihohotera.
Etiyopiya ihakana gukora ihohotera risesuye, yamaganye yivuye inyuma ibivugwa kandi yagerageje kugabanya igihe cy’iperereza. Yanaharaniye kwumvikanisha ingamba zayo z’ubutabera, ari nayo nzira yifuzaga ko ikorwaho iperereza, icyifuzo komisiyo ya ONU ibona ko “gifite inenge zikabije”.
Mw’isesengura ryo kuwa kabiri, komisiyo y’uburenganzira bwa muntu yanzuye ko hari ibyago byo ku rwego rwo hejuru ko amarorerwa azakomeza, kuko isanga ingingo shingiro umunani zose zagaragajwe na ONU, ziboneka muri Etiyopiya.
Aha havugwamo ubushyamirane buheruka mu ntara y’Amhara muri aya mezi no kuba guverinema yarananiwe kugeza mu butabera, abantu bakoze ibyaha mu gihe cy’intambara mu ntara ya Tigreya. ONU ivuga ko ubu bwari kuba, uburyo bwo gutuma amarorerwa atazongera kuba. (Reuters)
Forum