Senegal yatangaje ko ubwato bwari bupakiye abimukira biganjemo abanyasenegali, bwiyubitse ku nkombe za Cap Vert, mu nyanjya ya Atlantika.
Hari ubwoba ko abantu barenga 60 baba bapfuye.
Ubwo bwato bwahagurutse muri Senegali kw’itariki ya 10 burimo abagenzi 101. Kugeza ubu abagera kuri 38 ni bo bamaze gutabarwa. Igihe impanuka yabereye nticyahise kimenyekana.
Minisitri w’ububanyi n’amahanga yavuze ko abarusimbutse bari ku kirwa cya Sal cya Cap Vert, aho Senegali irimo gukorana n’abayobozi baho, kugirango abo bantu basubizwe iwabo. Umwe muri abo aturuka muri Gineya Bisawo.
Inzira yo mu mazi y’inyanja y’Atlantika ihera ku nkombe z’uburengereza bw’Afurika yerekeza mu birwa bya Canaries, ikoreshwa n’abimukira b’abanyafurika kugirango bagere muri Esipanye. Ni imwe mu zigwamo abantu benshi kw’isi. Mu bihe by’impenshyi, nibwo haba hari abagenzi benshi.
Umuvugizi w’ishami rya ONU ryita ku bimukira OIM, Safa Msehli, yavuze ko inzira zitekanye kandi zisanzwe ku bimukira, zabuze, bikaba ari byo biha uburyo abajyana ubantu mu buryo butemewe n’amategeko n’abacuruza, bwo kubashyira mu nzira zibaviramo urupfu.
Yongeyeho ko OIM irimo gushakisha amakuru kandi ko batarabona ibisobanuro ku bijyanye n’iyo mpanuka iheruka.
Abantu byibura 559 bapfuye bagerageza kugera mu birwa bya Canaries mu mwaka wa 2022, mu gihe 126 bapfuye cyangwa baburiwe irengero mu rugendo rw’amezi atandatu ya mbere y’uyu mwaka, aho habaruwe amato 15 yashwanyaguritse, hakurikijwe amakuru ya OIM.
Abantu 15 byibura bararohamye ubwo ubwato bwari butwaye abimukira bwiyubikaga ku nkombe hafi y’umurwa mukuru wa Senegali, Dakar mu mpera z’ukwezi gushize kwa karindwi.
Forum