Cardinal Becciu, wahoze ari nimero ya gatatu mu butegetsi bwa kiliziya gatorika, ashinjwa ibyaha bya ruswa.
Urubanza rwa Cardinal Becciu, Umutaliyani w’imyaka 75 y’amavuko, rwari rumaze imyaka ibiri yuzuye ruburanishwa mu rukiko mpanabyaha rwa Vatikani. Becciu aregwa ibyaha bya ruswa, gucunga nabi umutungo wa Vatikani, no gukoresha nabi umwanya yari afite, ibyaha bituruka mu gishoro cyo kugura inyubakwa ihenze muri Chelsea, mu mujyi wa Londres mu Bwongereza.
Umushinjacyaha avuga ko Cardinal Becciu yayitanzeho imali irengeje cyane agaciro kayo, bituma Kiliziya ihomba amadolari ari hagati ya miliyoni 154 na miliyoni 210. Cardinal Becciu yaburanye ahakana ibyaha aregwa.
Mu myanzuro ye, umushinjacyaha yamusabiye gufungwa imyaka irindwi n’amezi atatu, kumuca mu milimo yose ya Vatikani ubuzima bwe bwose, n’ihazabu y’amadolari 11,000. Yasabiye abandi icumi bareganwa na Cardinal Becciu igifungo cy’imyaka iri hagati y’itatu na 15. Yarusabye kandi gufata umutungo wabo bose hamwe ungana n’amadolari arenga miliyoni 460 yo gukuramo igihombo bateye Vatikani.
Urukiko ruzantangaza umwanzuro warwo mu mpera z’umwaka.
Cardinal Angelo Becciu yahoze yungirije sekereteri wa leta wa Vatikani (ni ukuvuga minisitiri w'intebe wa Papa), ashinzwe imali, kuva mu 2011 kugera mu 2018. Kuva mu 2018 kugera ahagaritswe mu kazi mu 2020, yari akuriye urwego rwa Vatikani rwiga dosiye z’abashobora kujya mu rwego rw’abatagatifu. Papa Fransisko yamusabye kwegura mu kwezi kwa cyenda 2020, anamukuraho ubudahangarwa kugirango ubutabera bwa Vatikani bubashe kumukurikirana.
Yamwambuye kandi n'ububasha bwose bujyanye n'urwego rwa Cardinal, burimo ko adashobora kwicara mu batora umushumba wa kiliziya mushya biramutse bibaye ngombwa. Abatora bagomba kuba batarengeje imyaka 80 y’amavuko.
Abakurikiranira hafi ibya kiliziya gatulika bavuga ko urubanza mpanabyaha rw'umukaridinali ari ikintu kidasanzwe mu mateka.
(AP, Reuters)
Forum