Muri Kenya, imyigagarambyo y’abatavuga rumwe n’ubutegetsi yamagana izamuka ry’imisoro igeze ku munsi wayo wa kabiri muri iki Cyumweru.
Abashyigikiye abatavuga rumwe n’ubutegetsi bwa Kenya, bari mu mihanda ku nshuro ya kabiri bikurikiranije, bamagana ubuzima buhenze n’izamuka ry’imisoro. Ni nyuma y’uko polisi isakiranye n’abigarambije ejo kuwa Gatatu, igata muri yombi byibura 300.
Imyigaragambyo yatangiye kuwa Gatatu izageza ejo kuwa Gatanu, ni ku ncuro ya gatatu ibaye, itumijwe n’abatavuga rumwe n’ubutegetsi muri uku kwezi. Amakuru avuga ko abantu benshi barashwe, kandi ko hashobora kuba hari n’abapfuye ejo kuwa gatatu.
Biravugwa kandi ko abayobozi bakuru benshi batavuga rumwe n’ubutegetsi batawe muri yombi.
Umuyobozi utavuga rumwe n’ubutegetsi Raila Odinga, uyu munsi yanditse kuri Twitter agira ati: “Ijwi rya rubanda rigomba kwumvikana. Imyigaragambyo yacu mu mahoro, irakomeje”.
Ikinyamakuru The Nation cyatangaje ko ihuriro ry'amashyaka riyobowe na Odinga, Azimio, ryahamagariye abarishyigikiye guhurira ku mbuga z’i Haruma na Kangemi mu murwa mukuru Nairobi.
Televisiyo NTV yerekanye umubare munini w’abapolisi boherejwe i Jacaranda mu bice bya Nairobi, aho abatavuga rumwe n’ubuyobozi bahuriye mu bihe byahise.
Amaduka menshi yongeye gufungura mu mujyi uyu munsi n’urujya n’uruza rw’imodoka rwagarutse mu mihanda minini. Amashuri nayo yongeye gufungurwa i Nairobi, mu mujyi wo ku cyambu cya Mombasa n’i Kisumu umujyi wa gatatu mu bunini wa Kenya. Ejo kuwa Gatatu byose byari bifunze.
Forum