Afrika y'Epfo Yaba Inyuramo Imari Itubutse y'Umutwe wa Leta ya Kislamu n'Indi Mitwe y'Iterabwoba

Afrika y'Epfo yaba inyuramo imali itubutse y'Umutwe wa Leta ya Kislamu n'indi mitwe y'iterabwoba. Afrika y'Epfo ni cyo gihugu cya mbere gikize muri Afrika. Ifite demokarasi ikomeye.

Ntiyigeze igira ibitero by'imitwe y'iterabwoba, nka al-Qaida cyangwa Umutwe wa Leta ya Kislamu. Nyamara rero, mu kwezi kwa kabiri gushize, ikigo mpuzamahanga cyitwa FATF (Financial Action Task Force mu Cyongereza), GAFI (Groupe d'action financière) Gifarabsa, cyashyize Afrika y'Epfo ku rutonde rw'ibihugu binyuramo imali itubutse y'imitwe y'iterabwoba.

Imari itubutse ariko itazwi neza kubera amayeri menshi. Ariko ikinyamakuru cyo muri Afrika y'Epfo gisohoka buri cyumweru cyitwa Sunday Times gitanga urugero ko mu 2020 n'2021 imari irenga amadolari miliyoni 340 yanyuze muri Afrika y'Epfo ajya mu bikorwa by'iterabwoba muri za Repubulika ya Demokarasi ya Kongo, Mozambike, Kenya, Somaliya, Nijeriya na Bangladeshi yo muri Aziya.

Nk'uko tubibona ku rubuga rwa minisiteri y'imali ya Leta zunze ubumwe z'Amerika, FATF yashinzwe mu 1989 na G7, ibihugu birindwi bya mbere bikize kw'isi. Igizwe n'ibihugu 39, ariko ibihugu byose bibishatse bishobora kwinjiramo. Ifite icyicaro gikuru i Paris mu Bufaransa. Mu byo ishinzwe, harimo kugenzura no gukumira ibyaha mpuzamahanga by'iyezandonke no guha imali imitwe y'iterabwoba.

Mbere ya FATF ni Leta zunze ubumwe z'Amerika yari yafashe iya mbere. Mu kwezi kwa gatatu 2022, yatangaje urutonde rw'abenegihugu b'Afrika y'Epfo bafasha Umutwe wa Leta ya Kislamu (ISIS) n'indi mitwe y'iterabwoba nka ADL yavukiye muri Uganda ijya gushinga ibirindiro mu burasirazuba bwa Repubulika ya Demokarasi ya Kongo, Al-Qaïda, al-Shabab yo muri Somaliya, Hamas yo muri Palestina na Hezbollah yashinzwe na Irani muri Libani.

Leta zunze ubumwe z'Amerika yabafatiye ibihano. Farhad Hoomer. Afite imyaka 47 y'amavuko. Atuye mu mujyi wa Durban. Akekwaho gucunga imali ya ISIS muri Afrika y'Epfo. We arabihakana. Siraaj Miller: Amerika yemeza ko ayobora ishami rya ISIS mu mujyi wa Cape Town. Abdella Hussein Abadigga aregwa gushakisha insoresore zo kohereza mu myitozo mu mitwe y'iterabwoba. Peter Charles Mbaga ashinjwa korohereza urujya n'uruza rw'imali mu mitwe y'iterabwoba.

Amerika na FATF bashinja leta y'Afrika y'Epfo ko idashyira ingufu mu bikorwa byo gukumira iterabwoba n’urujya n'uruza rw'imari yaryo. Yo ivuga ko yatangiye gufata ingamba zo kwikosora.