Frederick Leliman yahoze ari umupolisi w'igihugu ca Kenya, uyu musi wa gatanu, yaciriwe igihano co gupfa ku caha c'uko yagandaguye Willie Kimani, umunyamategeko aharanira agateka ka muntu, n’uwo yaburanira hamwe n'umudereva w'itagisi yari ibatwaye.
Frederick Leliman n’abandi bantu batatu bagiriwe n’ivyaha vyo kugandagura Frederick Leliman n’abandi babiri mu mwaka w’i 2016. Ni imwe mu madosiye y’ubunyamaswa n’ubwicanyi ndengerabutungane bikorwa n’abapolisi muri Kenya.
Umunyamategeko Willie Kimani yagandaguwe, yunganira umudereva w’itagisimoto yariko yitwarira Lileman amwagiriza ko yamurashe ari ku bariyeri yari kw’ibarabara.
Ibiziga vya Kimani, uwo yaburanira, Josephat Mwendwa n’umudereva w’itagisimoto, Joseph Muiruri vyatowe mu ruzi Ol-Donyo Sabuk River, mu buseruko bw’igihugu, imisi mikeyi inyuma y’uko bitangajwe ko irengero ryabo ritazwi.
Ivyemezo muri sentare vyerekanye ko banyurujwe inyuma y’urubanza muri sentare rwo kw’italiki 22 y’ukwezi kwa gatandatu mu mwaka w’i 2016. Barapfunzwe mu kanya gatoyi, mu nyuma y’aho bajanwa hanze baragandagurwa. Ibiziga vyabo vyatowe kw’italiki imwe y’ukwezi kw’indwi umwaka w’i 2016.
Frederick Leliman yaciriwe urubanza rwo gupfa mu gihe abandi bapolisi 2, Stephen Cheburet na Sylvia Wanjiku baciriwe igihano co gupfungwa imyaka 30 kuri Cheburet n’imyaka 20 kuri Wanjiku.
Umupolisi agira gatatu yitwa Peter Ngagi yatanze amakuru ku bagandaguwe yaciriwe imyaka 20 mu gihe uwugira kane, Leonard Mwangi yambitswe izera.
Abaciriwe urubanza rwo gupfa mu masentare yo muri Kenya bamara ubuzima bwabo bwose mu munyororo. Umuntu wa nyuma yaciriwe urubanza rwo gupfa yishwe hari mu mwaka w’i 1987. Abo bapolisi uko ari bane bagiriwe n’ivyaha bafise imisi 14 kugira bunguruze urubanza. (AP)
Facebook Forum