Abategetsi ba Reta ya Etiyoypiya bashitse uno musi ku wa mbere, ku murwa mukuru w'intara ya Tigreya, Mekelle. Bubaye ubwa mbere urugendo nk’urwo rubaye mu kiringo kigera ku myaka ibiri.
Umuvugizi w’inama nshingamateka ya Etiyoypiya, Tegesse Chaffo Dullo, yashitse ku murwa mukuru wa Tigreya, Mekelle, ayoboye abaserukira reta. Abo barimwo abanywanyi b’umurwi ujejwe ibiganiro ku rwego rw’igihugu bari mu ntara ya Tigreya gukwirikirana ishirwa mu ngiro ry’amasezerano agenewe guhagarika ingwano yihaye inkumbi mu kiringo c’imyaka ibiri.
Ayo masezerano yahagarikiwe n’umuryango w’ubumwe bwa Afrika. Yapfunditswe mu kwezi kw’icumi na rimwe kw’uyu mwaka mu gihugu c’Afrika y’epfo hagati ya Reta ya Etiyopiya n’umuhari TPLF wo mu ntara ya Tigreya.
Muri ayo masezerano, izo mpande zompi zaremeye guhagarika kurwana, hamwe no kuvana mu gihugu abarwanyi bo mu mahanga.
Umuhari TPLF waremeye gushira ibigwanisho hasi, hanyuma imfashanyo n’ibindi bintu ngedenderwako abanyagihugu bo muri Tigreya bakeneye zahagaritswe, bigasubira gutangwa.
Urugendo rw’abaserukira reta ya Etiyopiya rubonwa nk’ikimenyetso ko amasezeranao y’amahoro ariko arashinga imizi, naho umuhari TPLF uvuga ko ubwicanyi, ubusuma n’ugufata abapfasoni n’abakenyezi ku nguvu bikibandanya.
Bitegekanijwe ko abahuza bo muri Kenya n’umuryango w’ubumwe bwa Afrika nabo nyene bagendera umurwa mukuru wa Tigreya, Mekelle, muri iyi ndwi. (VOA NEWS)
Facebook Forum