Muri Leta zunze ubumwe z'Amerika, komite yihariye y'abadepite ikora anketi ku gitero cyo ku ngoro y'inteko ishinga amategeko, Capitol, yatoye imyanzuro yayo ya nyuma, isaba inzego z’ubutabera gukurikirana uwahoze ari perezida Donald Trump mu nkiko mpanabyaha.
Komisiyo igizwe n’abadepite icyenda, barindwi b’Abademokarate na babiri b’Abarepubulikani batavuga rumwe na Trump. Imaze umwaka n’igice ikora. Mu myanzuro yayo bose uko ari icyenda baraye bemeje, irarega Perezida Trump ibyaha bine: ubugambanyi bwo kwiba Leta zunze ubumwe z’Amerika, gutambamira inteko ishinga amategeko, Congress, mu milimo yayo, ubugambanyi bwo kuvuga ibinyoma, no kuba inyuma y’imyivumbagatanyo. Byose bishamikiye ku gitero cy’abayoboke be kuri Capitol, n’ibyo yakoze byose kugirango aburizemo ibyavuye mu matora y’umukuru w’igihugu yo mu kwa 11, 2020, kandi abizi neza ko yayatsinzwe.” Kuri Komite, Trump n’abambali be bashatse gukora “kudeta.”
Bityo Komite irasaba minisitiri w'ubutabera, ari we mushinjacyaha mukuru w’igihugu, kurega Perezida Trump mu nkiko mpanabyaha. Depite Bennie Thomson, akuriye Komite.
Aragira, ati: “Hari ikintu kimwe, nk’uko mbyiyumvisha, kiruta ibindi byose, cyatuma nta kindi gitero nk’icyo ku itariki ya 6 y’ukwa mbere 2021 kizongera kubaho. Ni ukubiryoza abagikoze. Inzego z’ubutabera ni zo zonyine zibifitiye ububasha kurusha iyi Komite na Congress. Dufite icyizere gikomeye ko akazi k’iyi Komite kazatanga inzira iganisha ku butabera, ku buryo inzego zibishinzwe zizifashisha amakuru dutanga kugirango zikore akazi kazo.”
Uretse Trump, Komite I rasabira gukurikiranwa na bamwe mu bari abajyanama be na bamwe mu badepite b’Abarepubulikani nkawe bamushyigikiye mu byaha aregwa.
Ibyo Komite isaba minisitiri w’ubutabera si itegeko kuri we. Ni we wenyine ufite ububasha n’uburenganzira bwo kubiha agaciro, no kujyana ikirego mu nkiko cyangwa kutakijyanayo. Ariko abahanga mu bya politiki bemeza ko iyi anketi y’abadepite ari akataraboneka mu mateka ya vuba ya Leta zunze ubumwe z’Amerika.
Mu milimo yakoze, Komite yaganiriye n’abatangabuhamya barenga 1,000. Inshuro icumi muri iyo biganiro byatambukaga kuri za televiziyo zo mu gihugu. Abantu amamiliyoni barazikurikiye. Komite kandi yakusanyije n’ibindi bimenyetso bitandukanye birenga miliyoni. Izashyira ku karubanda igice kimwe cy’imyanzuro yayo ejo kuwa gatatu. Ikindi gice kizakomeza kuba ibanga kubera amakuru arimo.
Mu cyumweru gishize, umuvugizi wa Trump, Steven Cheung, yateye utwatsi Komite y’abadepite. Mu itangazo yashyize ahagaragara, avuga ko imilimo yayo ari “ikinamico gusa, risuzugura ubwenge bw’Abanyamerika na demokarasi, urukiko rw’abantu banga Trump.”
Komite izaseswa ku mugaragaro ku itariki ya 3 y’ukwezi gutaha, inteko ishinga amategeko nshya itangiye imilimo yayo.
Mushobora kumviriza iyi nkuru mu majwi ya Thomas Kamilindi aha munsi.
Facebook Forum