Uko wahagera

Malawi: Polisi Yataye muri Yombi Umunyarwanda Ukekwaho Guturitsa Grenade


Ishusho ya Grenade

Abantu batanu b’impunzi mu nkambi ya Dzaleka muri Malawi baraye bakomerejekwe na grenade yaturikirijwe mw’isoko rikuru ry’iyi nkambi mu mugoroba w’ejo kuwa gatatu.

Polisi yataye muri yombi umunyarwanda ukekwaho kuba yaturikije icyo gisasu yabigambiriye. Ivuga ko abantu batatu barimo umuyobozi w’inkambi ukomoka mu Burundi bakomeretse cyane kandi ko bajyanywe ku bitaro byo mu ntara ya Dowa.

Gladson M'bumpha, ni umuvugizi wa polisi mu ntara Dowa. Yabwiye Ijwi ry’Amerika ko umwe mu bakomeretse bikomeye, ari Butoyi Fideli umuyobozi w’impunzi z’abarundi mu nkambi ya Dzaleka, wari kumwe n’umunyamabanga we, Bruno Ndaishime ubwo babonaga umuntu acana ikibirindi mbere yo kubajugunyaho grenade.

Abandi bantu 3 barimo umwana w’imyaka 11 y’amavuko, bakomeretse mu buryo butandukanye. Nabo bajyanywe mu bitaro by’i Dowa.

Hagati aho, polilsi ivuga ko yataye muri yombi impunzi y’umunyarwanda, Umoton John Peter, w’imyaka 42, ukekwaho kuba yateye iyo grenade. Byitezwe ko azitaba urukiko kwisobanura ku byaha, nyuma y’uko polisi izaba imaze gukora amaperereza ya yo.

Abategetsi muri guverinema n’abishami rya ONU ryita ku mpunzi, HCR bamaganye icyo gitero. Umuvugizi wa Polisi, M’bumpha, avuga ko abapolisi, ubu barimo gucunga inkambi, mu gucubya umwuka mubi uhari. (VOA News)

Facebook Forum

XS
SM
MD
LG