Uko wahagera

Abantu Bitwaje Intwaro Bishe Abasivili 9 Muri Irani


Hashize amazi abiri muri Irani haba imyigaragambyo idahagarara
Hashize amazi abiri muri Irani haba imyigaragambyo idahagarara

Muri Irani, abantu bitwaje intwaro bishe abaturage icyenda. Leta ivuga ko Israeli n'ibihugu byo mu burengerazuba bw'isi bashaka guteza intambara y'isubiranamo ry'abenegihugu.

Abantu barindwi biciwe mu mujyi wa Izeh, mu ntara ya Khuzestani, mu majyepfo y’uburengerazuba bw’igihugu. Abandi icumi barakomeretse.

Mu kindi gitero bitandukanye, abantu babiri biciwe mu mujyi wa Isfahan, mu ntara nayo yitwa gutyo, hagati no hagati mu gihugu. Abandi umunani barahakomerekeye.

Ibitero byombi byagabwe n’abantu bari ku mapikipiki. Ntawe urabyiyitirira. Ariko ibitangazamakuru bya leta ya Irani bivuga ko byakozwe n’abantu bari mu myivumbagatanyo.

Ni ko leta yita imyigaragambyo y’akataraboneka, imaze amezi abiri idahagarara. Imiryango iharanira uburenganzira bwa muntu yemeza ko abantu 362 bamaze kuyigwamo, naho abandi 16,033 bari bayirimo batawe muri yombi.

Mu kwezi gushize, ibindi bitero byahitanye abantu byibura 12 muri Irani. Umutwe wa Leta ya Kislamu warabyiyitiriye.

Naho leta ya Irani irarega inzego z’ubutasi za Isirayeli n’ibihugu byo mu burengerazuba bw’isi kuba inyuma y’ibibazo by’umutekano biri mu gihugu.

Mu butumwa yanyujije kuri Twitter, minisitiri w’ububanyi n’amahanga, Hossein Amirabdollahian, yemeza ko bishaka guteza intambara y’isubiranamo ry’abenegihugu. Ariko, ati: “Gusa bamenye ko Irani atari Libiya cyangwa Sudani.”

Facebook Forum

XS
SM
MD
LG