Uko wahagera

Urubanza Rwa Camara Ushinjwa Ubwicanyi Muri Gineya Rwatangiye


Ifoto ya Moussa Dadis Camara, hagati, mu 2009

Muri Gineya, urubanza rwa Capitaine Moussa Dadis Camara, rwari rumaze imyaka rutegerejwe, noneho rwatangiye mu mizi yarwo.

Camara yari mu buhungiro muri Burkina Faso. Yagarutse i Conakry muri wikendi ishize kugirango yitabe urukiko. Kuri uyu wa Kabiri, yabanje kubonana n’umushinjacyaha, wahise amushyira muri kasho.

Umunyamategeko Salifou Béavogui, umwe mu bavoka bamwunganira, yabwiye itangazamakuru ko Camara azaburana afunze kugera igihe urubanza ruzarangirira.

Rurabera mu rukiko rwarwubakiwe rwo ubarwo by’umwihariko. Ni bwo rukimara kuzura. Umukuru w’igihugu, Colonel Mamady Doumbouya, nawe wafashe ubutegetsi akoze kudeta mu mwaka ushize, yarutashye uyu munsi, mbere gato y’uko urubanza rutangira.

Abahohotewe, imiryango yabo, na rubanda muri rusange bari bamaze imyaka 13 barutegereje cyane, batizeye ko ruzigera rubaho.

Capitaine Camara n’abandi bantu 10, bose bari kumwe nawe ku butegetsi, bareganwa mu rubanza rumwe, bashinjwa ibyaha byibasiye inyokomuntu birimo ubuhotozi, gufata abagore ku ngufu, gushimuta abantu, iyicarubozo, gutwika, gusahura no kuyogoza igihugu.

Byose bituruka ku bwicanyi abasilikare be bakoze muri sitade nkuru ya Conakry ku itariki ya 28 y’ukwa cyenda 2009, barimarima inzirakarengane 156, bafata ku ngufu abagore n’abakobwa barenga ijana. Abandi baturage ibihumbi barakomeretse. Abandi amagana batawe muri yombi, bakorerwa iyicarubozo.

Facebook Forum

XS
SM
MD
LG