Jose Eduardo dos Santos yahoze ari prezida wa Angola yashingurwanye iteka uno munsi ku wa Mungu i Luanda ku murwa mukuru wa Angola. Eduardo dos Santos yasandabiye muri Espanye mu ntango z’ukwezi kw’indwi, ugushingurwa kwiwe kudindizwa n’amatohoza y’icamuhitanye umuryango wiwe wari wasavye.
Dos Santos yashengeye afise imyaka 79. We n’umuryango wiwe baranze politike ya Angola mu kiringo c’imyaka igera ku 38. Yavuye ku butegetsi bwa Angola yamazeko imyaka 38 mu 2017. Umuhisi Dos Santos ashinguwe mu gihe umurwi utunganya amatora muri Angola wemeza ko umugambwe wiwe MPLA ari wo watahukanye intsinzi mu matora ya prezida aheruka kuba muri ico gihugu.
Mu gisa nko kuburizamwo mu rwenge imyiyerekano abatemera ivyavuye mu matora, bashobora gukora bagamije kwereka abanyavyubahiro baje gushingura Dos Santos ko batizeye ivyavuye mu matora, polisi ya Angola ibicishije mw’itangazo yasavye abanyagihugu, abari mu mashirahamwe yigenga n’iy’indi mirwi kwigumya, bakareka gukora imyiyerekano mu ntumbero yo “kwubaha nyakwigendera”.
Umurwi utegura amatora muri Angola uvuga ko umugambwe MPLA wakomokamwo Umuhisi Jose Eduardo dos Santos waronse amajwi 51%, ugakurikirwa n’umugambwe UNITA ukomeye mu yitavuga rumwe na Reta waronse 44.5%. Costa Junior atwara UNITA, yanse ivyavuye mu matora avuga ko yabayemwo amahinyu. Harabaye n’imyiyerekano yiyamiriza ivyavuye muri ayo matora, ariko polisi iyiburizamwo. Umurwi utunganya amatora muri Angola yamara uvuga ko amatora yagenze neza cane.
Facebook Forum