Uko wahagera

Perezida Kagame Yamaganye Abayobozi Basaba Abaturage Ruswa


Perezida Paul Kagame

Perezida Paul Kagame uri mu ruzinduko mu ntara y’Amajyepfo n’iy’Uburengerazuba yasabye abaturage gutinyuka bakamagana imikorere mibi y’abayobozi itiza umurindi ruswa. Ibi yabigarutseho kuri uyu wa gatandatu mu karere ka Nyamasheke aho yaganiraga n’abatuye ako karere.

Mu mbwirwaruhame ye ku kibuga cy’umupira cya Kagano, Perezida Kagame yashimye abaturage ba Nyamasheke ku ruhare rwabo mu kwicungira umutekano cyane cyane mu gihe aka karere-kimwe n’utundi dukora ku ishyamba rya Nyungwe-kari kibasiwe n’ibibazo by’umutekano muke waterwaga n’ibitero by’inyeshyamba za FLN.

Aha umukuru w’igihugu akaba yabasabye gukomeza gukorana neza n’inzego zishinzwe umutekano.

Perezida w’u Rwanda kandi yongeye gukomoza ku mikorere mibi ya bamwe mu bayobozi avuga ko badindiza abaturage bagamije kubaka ruswa. Asaba abaturage kutayihanganira bakayamaganira kure, byanaba ngombwa bakabimugezaho we ubwe.

Kimwe n’ahandi yanyuze muri uru ruzinduko rw’iminsi ine, i Nyamasheke naho byagaragaraga ko abanyotewe no gutura umukuru w’igihugu ibibazo ari benshi cyane. Ibibazo byabo ahanini byiganjemo iby’akarengane, ndetse n’iby’ubuhemu n’ubwambuzi bakorewe na ba rwiyemezamirimo.

Aha kandi hongeye kugaragara bimwe mu bibazo Perezida Kagame ubwe yagiye atangaho imirongo y’uburyo bwo kubikemura mu myaka yashize, ariko bikaba bigaragara ko nta cyigeze gikorwa mu kubikemura.

Aha i Nyamasheke Perezida Kagame yashimiye abaho ku kuba baramutoye ku bwinshi muw’2017, ababwira ko we ubwe yiyumvamo ko abafitiye umwenda wo kubafasha gutera imbere.

Aka ni akarere kaza ku mwanya wa mbere mu dufite abaturage benshi bakennye mu Rwanda aho ibarura riheruka ku bijyane n’imibereho rusange y’ingo ryo muw’2014 ryagaragazaga ko 69 ku ijana by’abatuye Nyamasheke babayeho mu bukene, abagera hafi kuri 40 ku ijana bakaba bari mu bukene bukabije.

Ni akarere kandi gafite ikibazo cy’imihanda myinshi idakunze kuba nyabagendwa cyane cyane mu bihe by’imvura. Ibyo byose umukuru w’igihugu akaba yabijeje kubafasha kubikemura. Biteganijwe ko nyuma ya Nyamasheke, Perezida Kagame akomereza uruzinduko rwe mu karere ka Karongi nako ko mu ntara y’Uburengerazuba.

Facebook Forum

XS
SM
MD
LG