Uko wahagera

Myanmar: Ubutegetsi Bwanyonze Abantu Bane b'Impirimbanyi za Demokarasi


Phyo Zeyar Thaw, umwe mu banyonzwe n'ubutegetsi bwa gisirikare muri Myanmar

Muri aba bantu bishwe, harimo uwitwa Phyo Zeyar Thaw, w’imyaka 41 y’amavuko, wahoze ari depite w’ishyaka “National League for Democracy” ry’uwari umukuru w’igihugu Aung San Suu Kyi, nawe uri muri gereza.

Umugore wa Zeyar Thaw yatangarije ibigo ntaramakuru bitandukanye ko leta yanze gushikiriza imirambo imiryango yabo.

Abishwe bose uko ari bane baburanishijwe mu ibanga rikomeye cyane mu kwezi kwa mbere n’ukwa kane muri uyu mwaka. Inkiko zabahamije ibyaha by’iterabwoba. Zavuze ko “ryari rigamije kwivugana bamwe mu bategetsi ba gisirikare” bakoze kudeta mu kwezi kwa kabiri mu mwaka ushize.

Abatavuge rumwe na leta ya Myanmar bakorera mu buhungiro bemeza ko ibi byaha ari ibihimbano, kandi ko kunyonga abaharanira demokarasi ari uburyo bwo gutera ubwoba abaturage, kugirango badatinyuka guhangara ingoma ya gisilikare.

Amahanga, arimo Umuryango w’Abibumbye, imiryango iharanira uburenganzira bwa muntu, Leta zunze ubumwe z’Amerika, Ubufaransa, Ubuyapani, bamaganiye kure igikorwa cya leta ya Myanmar cyo “kunyonga abantu ibaziza gusa uburenganzira bwabo bw’ibanze bwo kwisanzura.”

Ni ubwa mbere abantu banyonzwe muri Myanmar muri iyi myaka hafi 50 ishize. Uretse izi mpirimbanye enye, abandi bantu barenga ijana nabo bakatiwe urwo gupfa nyuma ya kudeta, bategereje ikizakurikiraho. Naho abantu baguye mu mvururu zakurikiye kudeta bararenga 2,000, nk’uko abatavuga rumwe na leta babivuga.

Facebook Forum

XS
SM
MD
LG