Uwahoze ari minisitiri w’Intebe w’Ubuyapani , Shinzo Abe, yitabe Imana, yishwe arashwe.
Shinzo Abe yarasiwe mu mujyi wa Nara aho yari mu gikorwa cyo kwamamaza ishyaka rye. Uwamurashe yahise afatwa n’abashinzwe umutekano.
Minisitiri w’Intebe, Fumio Kishida, yamaganye ubwo bwicanyi bw’umuyapani wabaye minisitri w’intebe igihe kirekire mu mateka y’icyo gihugu.
Inkuru y’urupfu rwa Abe w’imyaka 67 yatangajwe nyuma y’amasaha atanu amaze kuraswa. Ni ku nshuro ya mbere ministiri w’intebe ucuye igihe cyangwa uri ku butegetsi yishwe kuva mu mwaka 1936. Icyo gihe hari habaye kudeta mu Buyapani hicwa abategetsi benshi barimo abahoze ari ba ministiri b’intebe.
Shinzo Abe yategetse Ubuyapani muri manda ebyiri, kuva mu mwaka wa 2006 kugera 2007 no kuva mu 2012 kugera mu 2020. Yeguye ku mirimo ye ku mpamvu z’uburwayi.
Abategetsi batandukanye barimo Perezida Joe Biden wa Leta zunze ubumwe z’Amerika bavuze ko babajwe n’urupfu rwa Shinzo Abe.
Mu itangazo rye, Perezida Biden yavuze ko Abe yaharaniye guteza imbere umubano n’ubutwererane hagati y’Ubuyapani na Leta zunze ubumwe z’Amerika.
Uwo yasimbuye Donald Trump we yanditse ku rubuga rwa Truth Social ko urupfu rwa Abe ari igihombo gikomeye ku Buyapani.
Facebook Forum