Uko wahagera

Imyigaragambyo Ikaze Yongeye Kwaduka I Khartoum Muri Sudani


Umubare w’abamaze kugwa muri iyo myigaragambyo ugeze ku bantu 113 kuva ihirikwa ry’ubutegetsi ryaba mu kwa 10 k’umwaka ushize.

Muri Sudani, kuri uyu wa gatanu abigaragambiriza ubutegetsi bwa gisirikare bongeye guterana aho inzego z’umutekano zakoresheje ibyuka biryana mu maso mu kubatatanya.

Ni nyuma y’aho imyigaragambyo y’ejo kuwa kane yahuje ababarirwa mu bihumbi mirongo yadutsemo imvururu zaguyemo umubare munini w’abaturage utari bwabeho muri uyu mwaka w’abagera ku icyenda.

Impirimbanyi zibarirwa mu magana zateraniye hafi y’ingoro y’umukuru w’igihugu mu murwa mukuru Khartoum, bamagana ukwigarurira ubutegetsi kw’igisirikare kiyobowe na Abdel Fattah al-Burhan.

Bamwe mu bigaragambya baririmbaga ko “abaturage bashaka gukuraho Burhan”, mu gihe abandi bari bitwaje amafoto y’abiciwe muri iyo myigaragambyo imaze amezi, basakuza ngo “turahamagarira kwihorera.”

Umubare w’abamaze kugwa muri iyo myigaragambyo ugeze ku bantu 113 kuva ihirikwa ry’ubutegetsi ryaba mu kwa 10 k’umwaka ushize.

Ni nyuma y’aho kuri uyu wa gatanu hari uwapfuye azize ibikomere yagiriye mu myigaragambyo yo kuwa 24 y’ukwezi gushize kwa 6, nk’uko bitangazwa n’abaganga bo ku ruhande rw’abashyigikiye demukarasi.

Abaharanira uburenganzira basaba ko hasubizwaho ubutegetsi bw’inzibacyuho bwa gisivili, bwari bwashyizweho nyuma y’ihirikwa rya Omar al-Bashir ariko bukaza gukurwaho.

Izi mvururu ziheruka zirimo kuba hirengagijwe ubusabe bw’umuryango mpuzamahanga uhamagarira ko haba ituze.

Binyuze ku rubuga rwa Twitter, ibiro bya minisiteri y’ububanyi n’amahanga y’Amerika bishinzwe ibibazo by’Afurika byamaganye ikoreshwa ry’ingufu z’umurengera ku basivili bikozwe n’inzego z’umutekano, binihanganisha imiryango yabuze ababo.

Facebook Forum

XS
SM
MD
LG