Umuryango mpuzamahanga uharanira uburenganzira bw’abanyamakuru-CPJ urashinja ubunyamabanga bw’umuryango Commonwealth uhuza ibihugu bivuga ururimi rw’icyongereza gukumira abanyamakuru mu nama ya CHOGM yatangiye kuri uyu wa mbere mu Rwanda.
CPJ irasaba ubunyamabanga bw’uwo muryango kwirinda guhindura isabwa n’itangwa ry’uburenganzira bwo gutara amakuru kuri iyi nama igikoresho cya politiki.
Mu nyandiko uyu muryango wasohoye kuwa gatanu ushize, uravugamo abanyamakuru mpuzamahanga babiri bimwe uruhushya rwo gukurikirana iyi nama ihuza abakuru b’ibihugu na za guverinoma bivuga ururimi rw’icyongereza.
Abo nabo ni umunya Kanada Benedict Moran ndetse na Anjan Sundaram ukomoka mu Buhinde.
CPJ iravuga ko kuwa gatatu ushize, ni ukuvuga ku itariki ya 15 y’uku kwezi, ari bwo Benedict Moran yakiriye ubutumwa buvuye mu bunyamabanga bwa Commonwealth bumubwira ko ubusabe bwe bwanzwe.
Sundaram nawe wari wasabye uburenganzira binyuze mu kigo cya Moran yabwiye CPJ ko ubusabe bwe bwanzwe.
Ubunyamabanga bwa Commonwealth ngo bwamenyesheje Moran na Sundaram ko ubusabe bwabo bwanzwe bitewe n’uko badakorera “igitangazamakuru kizwi”.
Nyamara Moran akavuga ko mbere yagiye ahabwa uburenganzira bwo gukorera mu Rwanda binyuze muri icyo kigo cye. Uyu akavuga ko iki gisobanuro yahawe giteye urujijo.
Muri iyi nyandiko ya CPJ aba banyamakuru bombi barahuza ukwimwa uburenganzira kwabo n’inkuru cyangwa se inyandiko bagiye bandika ku butegetsi bw’u Rwanda no kuri Perezida Paul Kagame ubwe, mu bihe byahise.
Kuri Benedict Moran, CPJ iravuga ko yagiye akora inkuru zivuga ku byaha byo mu ntambara bikekwa kuri Perezida Kagame, kimwe no ku mpuha zaba zikwirakwizwa n’ishyaka riri kubutegetsi mu Rwanda-FPR hagamijwe kwibasira abatavuga rumwe n’ubutegetsi .
Ni mu gihe kuri Anjan Sundaram we, uyu muryango uvuga ko igitabo cye “Bad News: Last Journalists in a Dictatorship “ tugenekereje mu Kinyarwanda “Amakuru Mabi: Abanyamakuru banyuma mu butegetsi bw’igitugu” cyavugaga ku ihungabana ry’ubwisanzure bwo gutanga ibitekerezo mu Rwanda, cyaba ari yo ntandaro yo kwimwa uburenganzira.
Bwana Moran avuga ko” bibabaje kuba ubusabe bwe bwaranzwe, ariko kandi bidatunguranye kubera ko mu Rwanda amajwi yose agize icyo anenga acecekeshwa.” Uyu ati: “abanyarwanda benshi barahunze, cyangwa barapfa, bagerageza kugendera ku mahame y’umuryango wa Commonwealth, atari ku butegetsi bwahise gusa, ahubwo no kuri ubu buhari.”
Umuryango CPJ uharanira uburenganzira bw’abanyamakuru uravuga ko mu butumwa bwa e-mail, ubunyamabanga bwa Commonwealth bwemeje ko ari bwo butanga uburenganzira bwo gutara no gutangaza inkuru kuri iyi nama ku banyamakuru mpuzamahanga.
Ni mu gihe leta y’u Rwanda yo itanga ubwo burenganzira ku bitangazamakuru by’imbere mu gihugu.
Umuryango CPJ ugasaba ubunyamabanga bwa Commonwealth gukora ibishoboka abanyamakuru bose bakemererwa gutara inkuru zijyanye n’iyi nama ibera mu Rwanda nta kiguzi, kandi inzira yo gutanga ubwo burenganzira ikaba idakwiye kugirwa igikoresho cya politiki.
Uretse aba banyamakuru bombi CPJ ivuga ko bahakaniwe, uyu muryango uravuga ko kugera kuwa gatanu, abandi banyamakuru mpuzamahanga benshi bari batarabona uruhushya rwo gutara no gutangaza inkuru kuri iyi nama, nubwo bari barabusabye mbere y’itariki ya 23 y’ukwa gatanu yafatwaga nk’igihe ntarengwa cyo kubisaba.
Umuryango CPJ uvuga ko mu butumwa bwa e-mail wandikiwe n’umuvugizi wa Commonwealth yahakanye ibyo kuba uwo muryango waba urimo kuzitira abanyamakuru kugera muri iyi nama. Ubwo butumwa buvuga ko ubusabe bw’abanyamakuru bagera kuri 700 burimo kugenzurwa ngo bahabwe uburenganzira bwo kuza mu nama.
Gusa yirinze gusubiza ku kibazo kijyanye n’umubare w’ababa bamaze kwemererwa, uw’abamaze kwangirwa, n’uw’abo ubusabe bukigwa.
Ku ruhande rwa leta y’u Rwanda, umuryango CPJ uravuga ko Madamu Yolande Makolo uvugira leta, mu butumwa yawoherereje, yawumenyesheje ko leta y’u Rwanda itanga uburenganzira ku banyamakuru b’imbere mu gihugu gusa.
Kandi ko ku rutonde rw’abanyamakuru mpuzamahanga bemerewe n’ubunyamabanga bwa Commonwealth ukaruha leta, amazina ya Moran na Sundaram atarimo.
Uyu muvugizi wa leta abajijwe niba leta y’u Rwanda yaba ifite uburenganzira bwo gutambamira izina runaka kujya kuri urwo rutonde, ibyo yabihakanye.
Umuryango CPJ uri mu igera kui 23 iheruka guhamagarira abakuru b’ibihugu na za guverinoma bahuriye mu muryango Commonwealth gusaba u Rwanda kubahiriza uburenganzira bwa muntu no kwemerera abanyamakuru gukurikirana iyi nama.
Ubushakashatsi bw’uyu muryango buheruka ku birebana n’abanyamakuru bafunzwe kugeza ku itariki ya mbere y’ukwa 12 umwaka ushize, bwagaragaje u Rwanda nka kimwe mu bihugu biza imbere y’ibindi mu gufunga abanyamakuru ku mugabane w’Afurika, n’abagera kuri 7 bari mu buroko.
Facebook Forum