Abasirikare ba Amerika hamwe n’aba Koreya y’epfo, bariko bakorera hamwe imyimenyerezo ya gisirikare barashe amamisile umunani mu kirere. Iyo myimenyerezo ibaye umusi umwe inyuma y’aho Koreya ya ruguru ikoreye imyimenyerezo ya gisirikare nayo nyene ikarasa misile umunani mu kirere.
Imyimenyerezo hagati y’abasirikare ba Amerika na Koreya y’epfo yamaze ikiringo c’iminota cumi. Yari igizwe na missile imwe y’abanyamerika hamwe n’indwi za Koreya y’epfo. Ayo mamisile yarashwe mu kirere arungikwa mu nyanja y’Ubuyapani.
Igisirikare ca Koreya y’epfo cavuze ko iyo myimenyerezo yari iyo kwerekana ko bafise ububasha bwo kwivuna ibitero bishobora gukorwa na Koreya ya ruguru.
Ku musi w’Imana igisirikare ca Koreya ya ruguru carakoze imyimenyerezo yamaze iminota 35. Muri yo barashe amamisile ya hafi umunani yatewe ava mu bice bine vy’igihugu harimwo n’izavuye hafi y’umugwa mukuru Pyongyang.
Iyo myimenyerezo yakozwe uno musi hagati ya Amerika na Koreya y’epfo ibaye iya kabiri kuva prezida mushasha w’ico gihugu, Yoon Suk Yeol, agiye ku butegetsi. Yararahiye ko atazokwihanganira agasotoro ka Koreya ya ruguru.
Facebook Forum