Uko wahagera

Rwanda: Urubanza rwa Miss Elsa Rwashizwe mu Muhezo


Miss Elsa Iradukunda

Iradukunda Elsa wabaye Nyampinga w’u Rwanda muri 2017 yagejejwe imbere y’urukiko rw’ibanze rwa Kagarama, i Kigali kuburana ku ifungwa n’ifungurwa ry’agateganyo.

Yavuye mu modoka yambaye amapingu ku maboko, ipantalo n’ishati bisa afite dosiye mu ntoki yasaga nk’ikingirije amapingu yari ku maboko ye. Yagaragaraga nk’ufite ikininiga mu maso, ubona yabuze aho ahungira abanyamakuru benshi bacicikanaga bamufotora.

Kuva yafatwa, ni ubwa mbere agejejwe imbere y’urukiko ngo aburane ku ifungwa n’ifungurwa ry’agateganyo. Usibye abo mu muryango we, n’abanyamakuru bari benshi mu rukiko, nta mukobwa n’umwe witabiriye irushanwa rya Miss Rwanda cyangwa uwegukanye ikamba wagaragaye ahari kubera iburanisha.

Mu rukiko, Elsa yahise asomerwa umwirondoro we avuga ko ari wo, ahita asomerwa ibyaha akurikiranweho birimo icyo gukoresha inyandiko mpimbano, gutanga ubuhamya bw’ibinyoma, n’icyo koshya abitabajwe mu nzego z’ubutabera.

Miss Iradukunda Elsa n’umwunganira mu matageko, bahise basaba urukiko ko urubanza rwabo rwashyirwa mu muhezo. Uwunganira Iradukunda Elsa asaba ko urubanza rwashyirwa mu muhezo, kuko asanga ari byo byatuma uwo yunganira aburana atekanye neza.

Abishingira no ku mazina y’abavugwa muri uru rubanza bakeneye kurindirwa umutekano. Ubushinjacyaha nabwo bwemeje ubu busabe, buvuga ko bakurikije uburemere bw’iyi dosiye, kuyiburanishiriza mu muhezo ari byo byaba byiza.

Iradukunda Elsa wabaye Nyampinga w’u Rwanda muri 2017. Yatawe muri yombi mu ntangiriro z’uku kwezi urwego rw’ubugenzacyaha rumukurikiranyeho gutambamira ubutabera no gukoresha impapuro mpimbano mu kibazo kirebana n’urubanza rwa Ishimwe Dieudonne ukuriye ikigo cyahoze gitegura amarushanwa ya Nyampinga w’u Rwanda.

Inkuru y'Umunyamakuru w'Ijwi ry'Amerika i Kigali mu Rwanda, Assumpta Kaboyi

Urubanza rwa Miss Elsa Iradukunda
please wait

No media source currently available

0:00 0:02:00 0:00

Facebook Forum

XS
SM
MD
LG