Abagiraneza Ntibiriko Birabaorohera Gushikana Imfashanyo muri Etiyopiya

Amashirahamwe atabara imbabare atangaza ko naho impande zishamiranye muri Etiyopiya zatanze agahengwe mu ntumbero yo gushobora gushikana imfashanyo z’imiti n’ibiribwa mu banyagihugu, iki gikorwa kitariko kiroroha.

Nko mu karere ka Amhara kari mu buraruko bwa Etiyopiya, abagira neza basigura ko amabarabara yuzuyemwo ibibomoke n’ibisigarira birimwo ibikoresho vya gisirikare vyaturiwe n’abarwana.

ONU ivuga ko muri rusangi abanyagihugu bagera ku miriyoni 9 n’ibihumbi 400 bo mu burere bwa Amhara, Afar na Tigray ari bo bakeneye imfashanyo vyihuta. Biri uku mu gihe gushika muri utwo turere ONU yemeza ko bigoye.

Ku rundi ruhande, abakorera mu gisata c’amagara y’abantu mu makambi bikigoranye gushikamwo bemeza ko imiti n’ibikoresho vyo gupima indwara zirimwo hepatite na virusi ya Sida vyabaheranye.

Mu buraruko bwa Amhara, akarere abamenyeshamakuru batemerewe gukoreramwo, ONU ivuga ko ikigoyi cabaye ndanse.