Abanyamakuru muri Tuniziya biriwe mu myigaragambyo yo kwamagana ifungwa ry'umunyamakuru, Khalifa Guesmi, uzira kwanga gutanga isoko y’amakuru ye.
Muri iyo myigaragambyo yabaye kuri uyu wa Gatanu, abanyamakuru basabaga ko ubwisanzure bw’itangazamakuru bwubahirizwa mu gihugu.
Ibyapa byari bifashwe n’abanyamakuru hanze ya sendika yabo byari byanditseho ku gukora itangazamakuru atari icyaha. Barashinja ubutegetsi bwa Perezida Kais Saied gutoteza no kuniga itangazamakuru kuva ageze ku butegetsi mu 2021.
Khalifa Guesmi, ukorera radiyo Mosaique yafashwe mu cyumweru gishize ashinjwa ibyaha by’iterabwoba. Arazira inkuru yanditse ku bikorwa bya bamwe mu bategetsi bakorana n’imitwe avuga ko ikora iterabwoba mu gihugu.
Sendika y’abanyamakuru muri icyo gihugu yavuze ko ifatwa rya Guesmi rigaragaza ubwiyongere bw’umuvuduko wo kwibasira itangazamakuru byaheruka mu 2011. Iki ni igihe mu gihugu habaga imyigaragambyo yahiritse ku butegetsi perezida w’icyo gihe Zine el-Abidine Ben Ali.
Source ayj-kl/par/hkb
Facebook Forum