Mali Yahagaritse Ibimenyeshamakuru 2 vy'Ubufaransa

Muri Mali, leta yahagaritse ibitangazamakuru bibiri byo mu Bufaransa: RFI (Radio France Internationale) na televiziyo France 24. Abaturage bo muri Mali bakurikira cyane RFI na France-24. Mu itangazo yashyikirije ibigo ntaramakuru n'ibindi bitangazamakuru bitandukanye, umuvugizi wa guverinoma ya Mali, Colonel Abdoulaye Maiga, avuga ko RFI na France-24 bizira "amakuru y'ibinyoma" byatangaje kuwa mbere no kuwa kabiri w'iki cyumweru.

Ibi leta ya Mali yita ibinyoma ni amakuru ya komiseri mukuru w'ishami ry'Umuryango w'Abibumbye rishinzwe uburenganzira bwa muntu, Michelle Bachelet, n'umuryango mpuzamahanga uharanira uburenganzira bwa muntu Human Rights Watch, yemeza ko imitwe irwanya leta ya Mali, igisilikare cya Mali, gifatanyije n'umutwe w'abacanshuro Wagner w'Abarusiya, bica abaturage b'inzirakarengane benshi. RFI na France-24 byayavuzeho cyane, biha n'ijambo bihagije bamwe mu baturage bemeza ko barokotse ubwo bwicanyi.

Guverinoma ya Mali yamaganiye kure ibi birego bireba "intwari Fama (Forces Armées Maliennes)," ni ukuvuga ingabo z'igihugu. Yabujije kandi amaradiyo, amateleviziyo, n'ibindi bitangazamakuru byose byo muri Mali nabyo gutangaza amakuru ya RFI na France 24.

Itangazo (Colonel Maiga yatanze) rigereranya RFI na France-24 na radiyo RTLM yo mu Rwanda, yavuzweho kugira uruhare runini muri jenoside yakorewe Abatutsi mu 1994. Umubano ni mubi muri iki gihe hagati y'Ubufaransa bwakolonije Mali n'ubutegetsi bwa gisirikare bwa Mali. Mu itangazo ryayo, leta ya Mali ivuga ko amakuru ya RFI na France-24 ari mu "mugambi mugari wo guhungabanya politiki y'inzibacyuho ya Mali, gutesha umutwe abaturage ba Mali, no gutesha agaciro ingabo za Mali." RFI na France-24 byombi ni ibigo by'itangazamakuru bya leta y'Ubufaransa. Byatangaje ko bibabajwe n'icyemezo cya leta ya Mali.