Uyu wa kabiri ni umunsi w'umushahara ungana ku bagabo n'abagore muri Leta zunze ubumwe z'Amerika. Perezida Joe Biden arateganya kugabanya ubusumbane mu bakozi ba guverinoma yo ku rwego rw'igihugu.
Ikigo cya leta gishinzwe ibarura kivuga ko umugabo arusha umushahara umugore ku rugero rwa 18%. Ubusumbane bugaragara cyane kurushaho hagati y'amoko. Bityo, umuryango udaharanira inyungu uharanira uburinganire hagati y'abagore n'abagabo witwa “National Women’s Law Center” wemeza ko umugabo w'Umuzungu arusha umushahara ku rugero rwa 37% umugore w'Umwiraburakazi bakora akazi kareshya.
Guverinoma ya Perezida Biden irashaka inzira zo gukemura ikibazo cy'ubusumbane bw'imishahara n'icy'imyanya mu kazi. Muri rusange, abagore ntibahabwa ibakwiye ku rugero rumwe n'abagabo bafite ubumenyi n'ubushobozi bumwe.
Muri urwo rwego, ikipe y'igihugu y'umupira w'amaguru y'abagore, United States Women's National Team, yabaye urugero. Yarwanye urugamba rwo guhembwa umushara ungana n'uw'ikipe y'abagabo guhera mu 2019, iza kurutsinda mu kwezi kwa kabiri gushize. Perezida Biden, Visi-Perezida Kamala Harris, n'abandi batandukanye bari muri guverinoma yabo, barimo minisitiri w'umurimo Marty Walsh, barizihiza uyu munsi w'umushahara ungana ku bagore n'abagabo bari kumwe n'abakiri abakinnyi n'abacyuye igihe b'ikipe y'igihugu y'umupira w'amaguru y'abagore.
Kuri uyu munsi kandi, Perezida Biden arashyira umukono ku iteka rishyiraho akanama kazajya kagenzura ko politiki z'imishahara ingana ku bantu bakora akazi kareshya zubahirizwa.
Facebook Forum