Ikipe y'igihugu y'umupira w'amaguru y'abagore ya Leta zunze ubumwe z'Amerika (U.S. Women's National Soccer Team) yatsinze urugamba rwo guhembwa umushara ungana n'uwa basaza babo bo mu ikipe y'abagabo. Bari bamaze imyaka irenga itandatu babiharanira. Byabanje kunanirana, noneho mu 2019 bitura ubutabera. Byarakururanye kugera aho noneho Ishyirahamwe ry'umupira w'amaguru ku rwego rw'igihugu, U.S. Soccer Federation (USSF mu magambo magufi) ryemeye kumvikana nabo.
Kuwa kabiri tariki ya 22/2/2022, impande zombi zatangaje ko zumvikanye ko guhera ubu bose (abagore n'abagabo bo mu makipe y'igihugu) bazajya bahembwa umushahara ungana. Mu itangazo rimwe bashyize ahagaragara, bavuga ko bumvikanye ko bahagaritse imanza zose, USSF imaze kwemera guha abakinnyi b'ikipe y'igihugu y'abagore icyo twakwita nk'impozamalira zingana n'amadolari miliyoni 24.
Ikibazo kirangiye kubera USSF yabonye mu kwa gatatu 2020 umuyobozi mukuru w'umugore, Cindy Parlow Cone, nawe wahoze ari umukinnyi w'umupira w'amaguru mu ikipe y'igihugu kuva mu 1995 kugera mu 2006. Abamubanjirije, bose b'abagabo, bavugaga ko abagore badafite ingufu n'inshingano zingana n'iz'abagabo, bityo rero ko badashobora guhembwa umushahara ungana.
Icyamamare Megan Rapinoe, Kapiteni w'ikipe y'igihugu y'abagore, yatangarije ikigo ntaramakuru AP, ati: "Ibi byose twabikoreye abatugwa mu ntege. Kuba tuzagenda tugasiga bimeze neza kurusha uko twabisanze, ni ishema. Nta butabera bwaba buhari tunaniwe gukora ku buryo bitazongera ukundi."
Amateka y'ikipe y'igihugu y'umupira w'amaguru y'abagore
Ikipe y'umupira w'amaguru y'abagore ku rwego rw'igihugu ya Leta zunze ubumwe z'Amerika, USWNT mu magambo ahinnye y'Icyongereza, ni yo ya mbere ku isi (mu rwego rw'abagore) ku rutonde rwa FIFA, ishyirahamwe ry'umupira w'amaguru ku isi. Ifite intsinzi nyinshi mu mupira w'amaguru kurusha ibindi bihugu: ibikombe bine by'isi (1991, 1999, 2015, 2019), imidari ya zahabu ine mu mikino ya olempiki (1996, 2004, 2008, 2012), ibikombe umunani bya CONCACAF (1991, 1993, 1994, 2000, 2002, 2006, 2014, 2018). CONCACAF, ishyirahamwe ry'umupira w'amaguru ku mugabane w'Amerika ya ruguru, iyo hagati no mu birwa bya Caraibes, ni rimwe mu mashami atandatu ya FIFA.
USWNT yatwaye kandi ibikombe icumi Algarve Cup (2000, 2003, 2004, 2005, 2007, 2008, 2010, 2011, 2013, 2015). Algarve Cup yiswe "Mini FIFA Women's World Cup," bishatse nko kuvuga "Agakombe gato ka FIFA k'abagore ku rwego rw'isi." Iri rushanwa riba buri mwaka. Rihuza amakipe akomeye y'ibihugu y'abagore ku rwego rw'isi.
Ikipe y'abagabo y'igihugu ya Leta zunze ubumwe z'Amerika, basaza babo, yo nta gikombe na kimwe mu marushanwa ya FIFA iratwara. Ariko bakaba ari bo bahembwa menshi mu mishahara, mu macumbi n'ingendo iyo bari mu marushanwa, no mu bindi byinshi bitandukanye ikipe y'igihugu ikenera.
Uruhare rwa FIFA
FIFA nayo isumbanya cyane amafaranga iha amakipe y'abagabo n'ay'abagore. Urugero: mu 2014, ikipe y'abagabo y'Ubudage yatwaye igikombe cy'isi, FIFA iyiha amadolari miliyoni 35. Mu 2018, ikipe y'abagabo y'Ubufaransa yatwaye igikombe cy'isi, FIFA iyihemba amadolari miliyoni 38. Yose hamwe ni amadolari miliyoni 73. Aruta inshuro zirenga 12 miliyoni esheshatu gusa yose hamwe FIFA yahembye ikipe y'umupira w'amaguru y'abagore y'igihugu ya Leta zunze ubumwe z'Amerika, USWNT, imaze gutwara ibikombe by'isi 2015 n'2019.
Facebook Forum