Uko wahagera

Abanyamyuga muri Sudani Banze Kubonana n'Intumwa ya ONU


Aha ni mu gihe cy'imyigaragambyo i Khartoum tariki ya 24 y'ukwa mbere 2022.

Muri Sudani, ishyirahamwe ry'abanyamyuga batandukanye (Sudanese Professionals’ Association), riharanira demokarasi, riramagana imikorere y'Umuryango w'Abibumbye.

Iri shyirahamwe, SPA mu magambo magufi, ni ryo riri ku isonga mu myigaragambyo yo kurwanya igitugu cya gisilikare, yatangiye ihirika ingoma ya Perezida Omar Al-Bashir mu kwa kane 2019.

Uyu munsi, SPA yanze guhura n'intumwa yihariye ya ONU muri Sudani, Volker Perthes. Mu itangazo yanyujije kuri Twitter, irarega Umuryango w'Abibumbye ko "utigeze wamagana kudeta yahiritse minisitiri w'intebe w'umusivili, Abdallah Hamdok, ku itariki ya 25 y'ukwa cumi gushize, no kubogamira ku basilikare."

Kwanga inama na ONU ni uburyo bwo kwanga imishyikirano n'abasilikare. SPA irandika, iti: "Gushyira mu biganiro byanyu abakoze kudeta bivuguruzanya ku buryo butangaje n'ibyifuzo by'abaturage ba Sudani."

Ishyirahamwe ry'abanyamyuga rivuga ko abasikare bagomba kuva mu bya politiki no kwemera ko guverinoma y'abasivili bonyine gusa iyobora inzibacyuho.

Kuva kudeta ibaye muri Sudani, abaturage 79 barishwe. (VOA/AP/Reuters)

Facebook Forum

XS
SM
MD
LG