Zidane Yeguye Burundu ku Mwanya w'Umutoza wa Real Madrid

Zinedine Zidane yeguye ku mirimo yo gutoza Real Madrid, ubwegure bugomba guhita bushyirwa mu bikorwa, ibibaye ubwa kabiri mu mwuga we w’ubutoza.

Real Madrid yatwawe igikombe cya shampiyona ya Esipanye-La Liga na mukeba wayo Attlético Madrid kuwa gatandatu ushize irushwa inota rimwe gusa nyuma y’imikino y’umunsi wa nyuma.

Mu itangazo yashyize ahagaragara, iyi kipe yo muri Esipanye yagize iti:” Real Madrid C. F. iratangaza ko Zinedine Zidane yafashe umwanzuro wo guhagarika imirimo ye nk’umutoza mukuru w’ikipe yacu. Ubu tugomba kubaha icyemezo cye kandi tunamushimira ku bunyamwuga, ubwitange n’umurava byamuranze muri iyi myaka, ndetse n’icyo asobanuye kuri Real Madrid.”

Iryo tangazo rikomeza rigira riti:” Zidane ni umwe mu bihangange bya Real Madrid kandi umurage we utambutse kure ibyo yagezeho nk’umutoza ndetse n’umukinnyi mu ikipe yacu. Arabizi ko afite umwanya mu mitima y’abafana ba Real Madrid kandi muri Real Madrid hazahora ari iwe mu rugo.”

Nubwo yasoje shampiyona ku mwanya wa kabiri inyuma ya Atletico Madrid ndetse ikanagarukira muri kimwe cya kabiri cy’irushanwa ry’amakipe yahize ayandi mu bihugu byo ku mugabane w’Uburayi-Champions League, Real Madrid yaratengushywe cyane muri uyu mwaka w’imikino. Ni ku nshuro ya mbere mu myaka 11 Real isoje umwaka w’imikino nta gikombe na kimwe.

Gusa si ubwa mbere Zidane yegura ku gutoza iyi kipe kabuhariwe yo muri Espanye, yanakiniye kuva muw’2001 kugeza muw’2006. Uyu rurangiranwa w’umufaransa yahawe akazi bwa mbere muw’2016, yegukana ibikombe 3 byikurikiranya by’irushanwa ry’amakipe yahize ayandi ku mugabane w’Uburayi ndetse n’icya shampiyona ya Esipanye inshuro imwe. Yaje kwegura mu kwezi kwa gatanu kwa 2018, aza kugaruka gutoza iyi kipe nyuma y’amezi 10 yeguye.

Muri iki gice cye cya kabiri nk’umutoza wa Real, Zidane yegukanye shampiyona ya Esipanye mu mwaka w’imikino wa 2019-20 n’igikombe kiruta ibindi muri Esipanye. Icyakora, nyuma yo kuyobora iyi kipe mu mwaka wayo wa mbere utagira igikombe kuva muri 2009-10, uyu mufaransa w’imyaka 48 y’amavuko yongeye kwegura ku nshuro ya kabiri.