Nk'uko kaminuza Johns Hopkins yo muri Leta zunze ubumwe z'Amerika yabitangaje uyu munsi mu gitondo, virusi ya Corona imaze kwanduza abantu barenga miliyoni 83 n'igice no kwica abandi barenga miliyoni imwe n'ibihumbi 800 ku isi yose.
Leta zunze ubumwe z'Amerika iracyari ku isonga n'abantu barenga ibihumbi 345 virusi imaze guhitana. Bresil ni iya kabiri. Imaze gupfusha abantu bagera ku bihumbi 195. Hakurikiraho igihugu cy'Ubuhinde n'abantu barenga ibihumbi 148 bamaze kwitaba Imana.
Ku birebana n'urukingo, OMS (ishami ry'Umuryango w'Abibumbye ryita ku buzima) yahaye umugisha gukoresha byihutirwa urwakozwe n'ikigo gikora imiti Pfizer cyo muri Leta zunze ubumwe z'Amerika. Bivuze ko rushobora noneho gutangira kujya gufasha ibihugu bikiri mu nzira y'amajyambere mu gihe cya vuba. Kandi yabishyiriyeho n'ingamba. Bityo, OMS yashinze urwego rwitwa Covax kugura no kugeza urukingo ku bantu byibura miliyari ebyiri mu bihugu bikennye.
Usibye urukingo rwa Pfizer rwatangiye gukoreshya mu bihugu bitandukanye birimo Leta zunze ubumwe z'Amerika, izindi nkingo nyinshi zitandukanye ziracyageragezwa cyangwa nazo zatangiye gukoreshwa, nko mu Bwongereza, mu Burusiya, mu Bushinwa, no muri Bresil.
Hagati aho, virusi ya Corona iragenda yibaruka ubundi bwoko butandukanye n'iyamenyekanye bwa mbere mu kwa 12 mu mwaka w'2019 mu mujyi wa Wuhan, mu Bushinwa. Aya mashami, kandi nayo atandukanye hagati yayo, yabonetse nko mu Bwongereza, muri Leta zunze ubumwe z'Amerika, muri Nigeria, no muri Afrika y'Epfo.
Abahanga n'ubu ntibaramenya aho virusi ya Corona yaturutse, uko yavutse n'uko yageze ku muntu. OMS irimo irako anketi mu Bushinwa kugirango basobanukirwe.
Facebook Forum