Uko wahagera

Perezida Trump Yakiye Kandidatire y'Ishyaka ry'Abarepublikani


Perezida Trump Yakira kandidatire y'ishyaka rye

Leta zunze Ubumwe z’Amerika, mw’ijambo yatangarije kuri perezidansi y’igihugu, Maison Blanche, mw’ijoro ry’ejo kuwa kane, Perezida Donald Trump yavuze ko itora ryo mu kwezi kwa 11, rizagaragaza niba “tuzasigasira imibereho y’abanyamerika” cyangwa niba tuzareka abahezanguni bakabisenya burundu.

Perezida Donald Trump yabwiye imbaga y'abantu bari batumiwe barenga igihumbi, barimo bamwe bo nteko ishinga amategeko - Congress bo mu ishyaka rye ry'Abarepubulikani, bari bateraniye mu busitani bwa perezidanse Maison Blanche, ati: "Aya matora ni yo y'igitangaza mu mateka y'igihugu cyacu."

Abatumirwa bose bari bicaye begeranye, abenshi nta dupfukamunwa bambaye, birengagije amabwiriza y'inzego z'ubuzima yo kwirinda no gukumira icyorezo cya virusi ya Corona.

Ibipimo bitandukanye byerekana ko kandida w'Abademokarate Joe Biden bahanganye muri aya matora amuri imbere mu majwi, yemwe no muri za leta zimwe na zimwe zisanzwe zifite amateka yo gutora Abarepubulikani gusa.

Perezida Trump yamaze igihe kinini mu ijambo rye yikoma kuri Joe Biden, avuga ko ari "virusi" bita “Trojan horse” yo yinjira kandi ikangiza za mudasobwa. Mu rufaya rw'amashyi y'abatumirwa. Trump yavuze ko "virusi Biden" ishaka gusenya igihugu. Ati: "Ni umuntu wamye asenya imilimo y'Abanyamerika. Niba ahawe amahirwe yo gutegeka igihugu, azasenya ubuhangange bw'Amerika. Biden si umucunguzi wa roho y'Amerika."

Trump yaravuze ngo "mu myaka 47, Joe Biden yakiriye impano z'amadolari z'abakozi biyumva mu ishyaka rye ry'Abademokara bita "Ishyaka ry'Ubururu." Yamaraga kuyafata akabahobera akababwira ko yumva imibabaro bafite. Nyamara yagaruka i Washington agatora amatekegeko yemerera ibigo by'ubucuruzi n'inganda bitanga akazi byigira gukorera mu Bushinwa no mu bindi bihugu bya kure." Aha Trump arakomoza ku myaka 47 Biden yamaze ari senateri na visi-perezida wa Repubulika.

Ijambo rya Perezida Trump ryamaze isaha n'iminota icumi. Yemeza ko yafatiye Ubushinwa ingamba zikarishye mu rwego rw'ubukungu. Abushinja ko ari bwo bwatumye virusi ya Corona ikwirakwira isi yose. Nyamara rero, mu ntangiriro z'ubutegetsi bwe Trump yari afitanye umubano mwiza na mugenzi we w'Ubushinwa Xi Jinping. Bagiranye ibiganiro bihambaye mu rwego rw'ubuhahirane.

Virusi ya Corona imaze kwaduka, Trump yashimagije cyane Xi Jinping ukuntu yayirwanyije. Bimaze guhinduka, Trump atangiye kuvuga ko virusi ya Corona ari virusi nshinwa yategeje ibibazo ubuzima n'ubukungu by'Abanyemerika, yatangiye kuvuga ko Joe Biden ari igikoresho cy'Ubushinwa. Mu ijambo rye yavugiye mu bisitani bwa Maison Blanche kuwa kane nijoro, ati: "Imigambi yose ya Joe Biden icurirwa mu Bushinwa. Naho iyanjye icurirwa hano muri USA, Leta zunze ubumwe z'Amerika."Perezida Trump yavuze ko aramutse yongeye gutorwa "azahangana n'Ubushinwa kurushaho." Ati: "Nta kintu na kimwe tuzayikeza."

Mbere y'ijambo rye, ikipe yo kwiyamamaza kwa Joe Biden yari yabanje kumwikoma mu itangazo yasohoye, ivuga ko "Trump ari we perezida wa mbere na mbere w'Amerika udashoboye akazi ke ku birebana n'Ubushinwa." Bati: "Byaramunaniye buri gihe kurengera inyungu z'Amerika imbere ya guverinoma y'Ubushinwa."

Ikipe ya kandida Joe Biden ikomeza yemeza ko "igihe virusi ya Corona yadutse, Trump yakwirakwije ibinyoma bya perezida w'Ubushinwa Xi Jinping. Intambara yagabye ku bushinwa mu rwego rw'ubuhahirane yahombeje bikomeye abahinzi-borozi, abashoramari, abaguzi, n'abakozi bo muri Amerika. Hejuru y'ibyo, Trump yinginze Xi Jinping kumufasha kugirango yongere gutorwa" mu kwa cumi na kumwe gutaha.

Joe Biden we ku giti cye, kuwa kane yamaganye igikorwa cya politiki cya Trump cyo kuvugira ijambo ryo kwiyamamaza kuri Maison Blanche, binyuranyije n'imigenzo iri mu mateka y'Amerika.

Ijambo rya Perezida Trump ryashoje iminsi ine y'inama kaminuza y'ishyaka rye ry'Abarepublikani. Kimwe n'iy'Abademokarate mu kindi cyumweru cyabanjirije, nayo yabaye ahanini ku buhanga bw'amashusho ya videwo, mu rwego rwo kwirinda icyorezo cya virusi ya Corona imaze guhitana abantu barenga ibihumbi 180, no kwanduza abandi hafi miliyoni esheshatu, muri Leta zunze ubumwe z'Amerika, nk'uko imibare ya kaminuza Johns Hopkins y'i Washington ibyerekana. Perezida Trump yatangaje ko Amerika "izaba yakoze urukingo bitarenze uyu mwaka, cyangwa ndetse vuba aha cyane."

Inaha muri Leta zunze Ubumwe z’Amerika, mw’ijambo yavugiye kuri perezidansi y’igihugu, Maison Blanche, mw’ijoro ry’ejo kuwa kane, Perezida Donald Trump yavuze ko itora ryo mu kwezi kwa 11, rizagaragaza niba “tuzasigasira imibereho y’abanyamerika” cyangwa niba tuzareka abahezanguni bakabisenya burundu. Mu gihe inama kaminuza y'Abarepubukani yarimo iba, abaturage bari mu myigaragambyo mu mujyi wa Kenosha, muri leta ya Wisconsin, kubera iraswa ry'Umwirabura Jacob Blake ku cyumweru gishize mu mujyi wa Kenosha, muri Leta ya Wisconsin, mu majyaruguru y'uburengerazuba bwo hagati.

Umupolisi w'Umuzungu yamurashe amasasu menshi mu mugongo, arakomereka bikomeye, ariko ntiyapfa. Muri iyi myigaragambyo habayemo no gutwika inyubakwa n'ubunndi bwicanyi. Umusore w'imyaka 17 arakekwaho kuyirasamo yica abantu babiri akomeretsa bikomeye n'undi wa gatatu. Ubu yatawe muri yombi.

Mu ijambo rye, Trump ntiyigeze akomoza kuri Jacob Blake. Ahubwo yashimangiye ko ashaka gukomeza umudendezo n'itegeko. Yamaganye abateza akaduruvayo n'abasahura. Yemeza ko bakoreshwa n'abo mu ishyaka ry'Abademokarate.

Mu matora ataha, Trump aramutse atsinzwe yaba abaye perezida wa gatatu w'Amerika mu myaka 40 ishize utegetse manda imwe. Babiri byabayeho ni Jimmy Carter watsinzwe na Ronald Reagan mu 1980, na George H.W. Bush (ni ukuvuga Bush mukuru) watsinzwe na Bill Clinton mu 1992.

Facebook Forum

XS
SM
MD
LG