Uko wahagera

Ubushinwa Buzihimura ku Bihano by'Amerika mu Buhe Buryo?


Chen Quanguo ni we wa mbere Amerika yafatiye ibihano. Ni umukuru w'ishyaka rimwe rukumbi ry'Ubushinwa mu ntara ya Xinnjiang akaba n'umwe mu bagize Politburo, urwego rukuru rw'ishyaka ku rwego rw'igihugu.

Leta y'Ubushinwa yatangaje uyu munsi ko nayo izafatira ibihano Leta zunze ubumwe z'Amerika, Amerika nayo imaze gushyiraho ibihano ku bategetsi b'Ubushinwa bamwe na bamwe irega guhutaza uburenganzira bw'Abayisilamu b'aba-Uighur.

Umuvugizi wa minisiteri y'ububanyi n'amahanga y'Ubushinwa yabwiye itangazamakuru, Zhao Lijan, ati: "Ibihano by'Amerika ni ukwivanga bikomeye mu bibazo bwite by'Ubushinwa. Bibangamiye cyane umubano hagati y'ibihugu byombi. Ubushinwa nabwo bwafashe icyemezo cyo kwihimura: bwafatiye ibihano imiryango n'abantu ku giti cyabo bo muri Amerika bitwaye nabi ku bibazo bya Xinjiang." Ariko ntiyatanze amazina y'abafatiwe ibihano, cyangwa se asobanure n'ibi bihano ibyo ari byo.

Ejo kuwa kane, minisitiri w'ububanyi n'amahanga wa Leta zunze ubumwe z'Amerika, Mike Pompeo, yatangaje ko Amerika yafatiye ibihano abategetsi b'Abashinwa irega icyo yita "guhohotera bikabije kandi bihoraho Abayisilamu b'aba-Uighurs (biganje mu ntara ya Xinjiang, mu majyaruguru y'uburengerazuba bw'Ubushinwa)."

Muri aba bategetsi, batatu ni Chen Quanguo, umukuru w'ishyaka rimwe rukumbi ry'Ubushinwa mu ntara ya Xinnjiang akaba n'umwe mu bagize Politburo, urwego rukuru rw'ishyaka ku rwego rw'igihugu, Wang Mingshan, ukuriye inzego z'umutekano muri Xinjiang, na Zhu Hailun, wigeze kuyobora ishyaka ry’igihugu muri iyi ntara. Mu bihano Amerika yabashyizeho harimo kubima viza bo n'imiryango yabo no gufatiira imitungo bashibira kuba bafite muri Amerika. Bivuga kandi ko nta Munyamerika uwo ari we wese wemerewe kugirana nabo ikintu cyose cy'ubuhahirane.

Ikibazo cya Xijiang si cyo cyonyine cyabaye uburozi mu mubano wa Leta zunze ubumwe z'Amerika n'Ubushinwa. Hiyongeraho n'amakimbirane ku ntara za Hong Kong na Tibet, kuri virusi ya Corona, no mu by'ubucuruzi hagati y'ibihugu byombi.

Facebook Forum

XS
SM
MD
LG