Uko wahagera

Amnesty International Iramagana ubwicanyi muri Etiyopiya


Gujii, Oromiyaa
Gujii, Oromiyaa

Umuryango mpuzamahanga uharanira uburenganzira bwa muntu Amnesty International urarega leta ya Etiyopiya ibyaha byo kwica abantu benshi no kubafunga bitanyuze mu nzira z'amategeko n'ubwo bwose minisitiri w'intebe, Abiy Ahmed, yahawe igihembo cy'amahoro kitiriwe Nobel.

Abiy Ahmed ari ku butegetsi kuva mu 2018. Yabonye igihembo cy'amahoro kitiriwe Nobel mu kwezi kwa 12 mu mwaka wakurikiyeho (2019). Nyamara Amnesty International yemeza ko imyaka ibiri ishize yabaye imyaka y'agahomamunwa mu ntara za Oromia (Abiy akomokamo) na Amhara.

Abo mu nzego z'umutekano, mu izina ry'intambara yo kurwanya iterabwoba nk'uko guverinoma y'Abiy ibivuga, bishe abasivili n'abanyururu batigeze baburanishwa, bimuye abandi benshi ku ngufu babatuza ahandi cyangwa babajyana ku gahato mu bigo ngororamuco. Amnesty International ibarega n'ibyaha byo gufata abagore ku ngufu.

Amnesty International ivuga ko idafite ikimenyetso na kimwe cyakwemeza ko abategetsi ba leta batanze amategeko. Ariko isanga ari amabi adashobora kuba batabizi. Urugero: uwayoboye imirimo yo gukora iki cyegeranyo, Fisseha Tekle, aragira, ati: "Ntiwafata abaturage ibihumbi icumi ukabafungira mu kigo cya gisirikari, nk'aho ari impanuka."

Amnesty International yemeza ko guverinoma ya minisitiri w'intebe Abiy Ahmed itashatse kugira icyo ivuga ku bushakashatsi bwayo. Naho imitwe ibiri itavuga rumwe na leta, ivuga kigamije kurenganura akarere ka Oromia, yatangaje ko "iki cyegeranyo cya Amnesty International kidashyira ku karubanda leta y'Abiy kandi ko itigeze itezuka ku mikorere y'abamubanjirije ku butegetsi."

Facebook Forum

XS
SM
MD
LG