Shampiyona ya Bundesliga mu Budagi Igiye Gusubira Gutangura

Shanseliye w’Ubudagi, Angela Merkel yatangaje kuri uyu wa gatatu ko shampiyona y’umupira w’amaguru yo muri ico gihugu Bundesliga ishobora kwongera gutangura mu mpera z’uku kwezi. Bizoba birangije amezi abiri yari aheze izo nkino zarahagaritswe kubera COVID-19.

Merkel yabimenyesheje ahejeje kuganira na baburamatari 16 b’ico gihugu inyuma y’aho abandura ku munsi mu gihugu bigaragaye ko bagabanutse.

Yashikirije kandi ko izo nkino zizoba ata barorerezi mu bibuga, hakomejwe ingingo z’isuku kandi imirwi ikina ibanje kwiyugaranira hamwe mu kiringo kanaka imbere yo kuja mu kibuga gukina.