Uko wahagera

Ukraine n'Uburusiya Byahererekanye Imfungwa


Oleg Sentsov, asohoka mu ndege

Ibihugu by'Uburusiya na Ukraine byatangiye igikorwa cyo guhererekanya imfungwa.

Ni ikimenyetso abantu benshi bavuga ko gitanga icyizere ko intambara mu burasirazuba bwa Ukraine imaze igihe ishyamiranyije ingabo za leta n'imitwe ishyigikiwe n'Uburusiya imaze igihe ishaka kwiyomora kuri Ukraine, yaba iri hafi kurangira.

Mu rukerera rwo kuri uyu wa gatandatu amabisi atatu arimo imfungwa z'abanya-Ukraine yagaragaye asohoka gereza ya Lefortovo iri mu mujyi wa Moscou.

Hagaragaye kandi indege yaturutse muri Ukraine yari izanye imfungwa z'Abarusiya.

Perezida Volodymyr Zelenskyi wa Ukraine ubwe n'imiryango y'imfungwa zari zifungiwe mu Burusiya bazindutse bajya kwakira izo mfungwa ku kibuga cy'indege cya Kyiv, umurwa mukuru wa Ukraine.

Perezida Zelenskyi yavuze ko iryo hererekanya ry'imfungwa ari intambwe ya mbere yo gusoza intambara imaze imyaka itanu mu burasirazuba bwa Ukraine.

Ku ruhande rw'Uburusiya, Perezida Vladimir Putin we yavuze ko icyo bagamije ari ukongera gusubukura umubano na Ukraine.

Umwe mu banya-Ukraine warekuwe ni Oleg Sentsov uzwiho gukora sinema. Yari yarakatiwe n'Uburusiya gufungwa imyaka 20 kuko yanenze icyemezo cy'Uburusiya cyo kwigarurira agake ka Crimea.

Facebook Forum

XS
SM
MD
LG