Uko wahagera

ONU Itangaza ko Abimukira Biciwe muri Libiya Barenga 55


Aha ni ahari hafungiye abimukira ubu hahindutse amatongo y'ivu.

Umuryango w’Abibumbye watangaje uyu munsi imibare mishya y’abimukira biciwe mu nkambi bafungirwamo muri Libiya, 55 barapfuye. Abandi barenga 130 barakomeretse. Abakozi ba ONU barimo bakora anketi baracyashakisha kandi indi mirambo mu matongo y’amazu indege yarashe.

Ibihugu bakomokamo ntibiratangazwa, ariko abenshi muri bo ni abo muri Afrika y’Abirabura. Ni ukuvuga Afrika yo hepfo y’ubutayu bwa Sahara. ONU ivuga ko ubu bwicanyi bushobora kwitwa “ibyaha by’intambara.”

Iyo nkambi y’ahitwa Tajoura, mu nkengero z’umurwa mukuru wa Libiya Tripoli yarashwe n’indege itagira umudereva – drone – ejobundi kuwa kabili nijoro. Leta ya Tripoli ivuga ko ari ingabo z’inyeshyamba General Khalifa Haftar ziyise “ingabo z’igihugu.” Ariko umuvugizi wazo yabihakanye, avuga ko “batibasira abasivili.”

Umuryango w’Abibumbye uremeza kandi ko ufite amakuru afatika yemeza ko abasilikali ba leta ya Libiya barashe kuri bamwe mu bimukira birukaga bahunga nyuma y’igitero cy’indege. Guverinoma ya Libiya ntacyo iravuga kuri ibi birego bya ONU.

Abimukira bagera kuri 500 n’ubu baracyafungiye i Tajoura, imwe mu nkambi zifungirwamo abimukira muri Libiya.

Facebook Forum

XS
SM
MD
LG