Uko wahagera

Leta ya Venezuela Yahagaritse Umunyapolitiki Roberto Marrero


Juan Guaido uyoboye abatavuga rumwe n'ubutegetsi bwa Perezida Maduro yari mu myigaragambyo mu mujyi wa Valencia tariki ya 16/03/2019

Muri Venezuela Juan Guaido utavuga rumwe n’ubutegetsi uheruka kwiyimika nk’umukuru w’igihugu w’inzibacyuho aravuga ko abakozi b’iperereza bafashe ushinzwe imirimo mu biro bye.

Roberto Marrero yatawe muri yombi mu ijoro ryakeye bamusanze iwe. Urugo rw’umunyamategeko Sergio Vergara narwo rwatewe hejuru rusakwa ariko we ntibamutaye muri yombi.

Ku rubuga rwe rwa Twitter Guaido yavuze ko atazi aho uwarushinzwe imirimo mu biro bye aherereye anasaba ko yarekurwa vuba na bwangu.

Perezida wa Venezuela Nicolas Maduro na Juan Guaido bombi biyita abakuru b’iki gihugu cyo mu majyepfo y’Amerika.

Leta Zunze Ubumwe z’Amerika zakomeje kwiyama leta ya Maduro zimubuza guta muri yombi Guaido cyangwa abakorana na we. Ushinzwe ububanyi n’amahanga bwa Leta Zunze Ubumwe z’Amerika Mike Pompeo yihutiye kwamagana icyo gikorwa asaba ko Merrero arekurwa.

Perezida Donald Trump wa Leta zunze Ubumwe z’Amerika kuwa kabiri yavuze ko uburyo bwose bwo gukura Maduro ku butegetsi bushoboka, ko ni binaba ngombwa ingufu za gisirikare zizakoreshwa.

Guaido yiyimitse nka Perezida w’inzibacyuho ku ya 23 z’ukwezi kwa mbere. Ashyigikiwe na Leta Zunze Ubumwe z’Amerika n’ibindi bihugu bigera kuri 50 byiganjemo ibyo muri Amerika y’Epfo.

Maduro we ashyigikiwe n’Uburusiya na Cuba, ni nawe ufite ubuyobozi bw’ingabo n’inzego z’ubutegetsi muri icyo gihugu.

Facebook Forum

XS
SM
MD
LG