Leta zunze ubumwe z’Amerika yatangaje uyu munsi ko ivuye mu masezerano yari ifitanye n’Uburusiya yo kugenzura intwaro za kilimbuzi zishobora kurasa muri kilometero ibihumbi bitanu na 500.
Aya masezerano yitwa, Intermediate-Range Nuclear Forces Treaty, INF mu magambo ahinnye y’Icyongereza. Yashyizweho umukono mu kwezi kwa 12 mu 1987 na Perezida Ronald Reagan w’Amerika na Mikhail Gorbatchev wari umukuru w’icyahoze ari Repubulika ziyunze z’Abasoviyeti. Yatangiye gukurikizwa mu 1988 inteko zishinga amategeko z’ibihugu byombi zimaze kuyemeza burundu.
Minisitiri w’ububanyi n’amahanga w’Amerika, Mike Pompeo, yatangaje ko kuva mu masezerano INF bizatangira kujya mu bikorwa guhera ejo kuwa gatandatu. Amerika imaze iminsi irega Uburusiya ko ari bwo bwatangiye kuyarengaho ikora intwaro nshyashya zibujijwe n’aya masezerano. Uburusiya bwo burabihakana.
White House yatangaje ko Amerika “atari yo yonyine yakomeza kubohwa na INF.” Umuryango OTAN yavuze ko ishyigikiye 100% icyemezo cya Leta zunze ubumwe z’Amerika. Naho minisitiri w’ububanyi n’amahanga w’Uburusiya, Sergei Ryabkov, yabwiye abanyamakuru ko ingaruka z’iki cyemezo ari uko ibindi bihugu bitandukanye bishobora kumva bifite uburenganzira bwo gukora intwaro za kilimbuzi.
Kuva mu masezerano INF kandi bitewe n’impungenge z’Amerika z’uko Ubushinwa bufite intwaro za misili zishobora kurasa kure y’aho INF itegeka. Ubushinwa ntiburi muri INF.
Facebook Forum