Abimukira 400 baturuka mu karere ko muri Afrika yo mu burengero baratabawe mu kiringo c’imisi ibiri mu buraruko bw’igihugu ca Niger mu bugaragwa hafi y’igihugu ca Algeria. Aayo makuru yatangajwe n’ishirahamwe mpuzamakungu rikwirikirana ibibazo vy’abimukira, “International Organization for Migration”, mu mpfunyapfunyo, IOM.
Abo bumukira batabawe mu bugaragwa bwa Assamaka, igice c’igihugu ca Niger cegereye urubibe na Algeria. Bashitse muri ico gice n’amagauru.
Kw’italiki 3 z’ukwezi kw’icenda, abimukira 347 bavuye mu bihugu 13 vyo mu karere ko muri Afrika yo mu burengero baratabawe n’umurwi w’abajejwe gutabara b’ishirahamwe IOM.
Abandi bimukira b’abanyafrika 92 bashitse mu karere ka Assamaka kw’italiki 4 z’ukwezi kw’icenda imbere yuko batabarwa.
Ishirahamwe IOM ntirimenyesha niba abo bimukira bari basubijwe inyuma n’igihugu ca Algeria. Iryo shirahamwe ritangaza ko bakiwe mu kibanza caryo c’agateganyo ca Arlit mu buraruko bwa Niger. Ishirahamwe IOM rivuga ko ababishaka bazosubizwa mu bihugu baje bavamwo.
Ku bw’ibiharuro bishikirizwa n’akarere k’i Bulaya, hafi y’ibice 90 kw’ijana vy’abimukira bavuye muri Afrika yo mu burengero baca muri Niger kugira bashike mu gihugu ca Libiya mu nyuma yaho bagatera bagana akarere k’i Bulaya.
Facebook Forum