Abaturage amagana basubiye mu myigaragambyo kuri uyu wa mbere mu murwa mukuru wa Madagascar, Antananarivo. Bamaganye ubwicanyi bwo mu yindi myigaragambyo y’ejobundi kuwa gatandatu ushize. Bwahitanye umubare w’abantu batavugaho rumwe na leta.
Ibitaro bivuga ko abapfuye ari babili. Abakomeretse ni 16. Naho abatavuga rumwe na leta bo bemeza ko abaturage bishwe ari batanu. Barega abashinzwe umutekano ko barashe amasasu yica muri rubanda.
Abatavuga rumwe na leta barakajwe n’amategeko mashya agenga amatora. Bavuga ko akumira bamwe mu matora y’umukuru w’igihugu ateganijwe mu kwezi kwa 11 cyangwa ukwa 12 muri uyu mwaka. Mu bavuga ko amategeko mashya ababuza kwiyamamaza, harimo Marc Ravalomanana, wategetse kuva mu 2002 kugera mu 2009 avaho ahiritswe n’igisilikali; na Andry Rajoelina, wabaye perezida w’inzibacyuho adatowe kuva mu 2009 kugera mu 2014.
Mu ijambo yavugiye kuri televiziyo ya leta no ku mbunga nkoranyambaga, Perezida Hery Rajao-narima-mpia-nina, yasabye abaturage bose gutuza. Ariko yaburiye ko abashinzwe umutekano badashobora kwihanganira abo avuga ko “bateza imvururu, abashaka kurwana, n’abashaka kubiba urwango.”
Nyuma y’ubwicanyi bwo kuwa gatandatu, Umuryango w’Afrika yiyunze wasabye abanyapolitiki ba Madagascar gucisha make. Ejo ku cyumweru nabwo imyigarambyo yari yakomeje.
Facebook Forum