Uko wahagera

Tanzaniya: Umuyobozi wa Chadema Yafunzwe


Umuyobozi mukuru w'umugambwe, Chadema, Freeman Mbowe

Uyu munsi mu gitondo muri Tanzania, polisi yataye muri yombi abayoboke batandatu b’ishyaka Chadema (Chama cha Demokrasia na Maendeleo) ritavuga rumwe na guverinoma. Barimo umuyobozi waryo Freeman Mbowe, n’umunyamabanga mukuru waryo Vincent Mashinji. Abandi ni abadepite barikomokamo batatu, n’umunyamabanga mukuru w’ishami rya Chadema mu kirwa cya Zanzibar.

Nk’uko ikigo ntaramakuru AFP cyo mu Bufaransa kibitangaza, bashyikirijwe urukiko rwa Kisutu, mu murwa mukuru Dar es Salaam. Barezwe “kubiba urwango no guhamagarira rubanda kwigomeka ku butegetsi.”

Mbowe ashinjwa ko yari mu myigagarambyo itari yemewe na leta ku italiki ya 16 y’ukwezi kwa kabili gushize, yahitanye umunyeshulikazi w’imyaka 22 utari uyirimo, wishwe n’isasu ryayobye ry’abapolisi. Muri disikuru yavugiyemo, Mbowe yatangaje ko Perezida John Magufuli ari hafi kuvaho.

Mu kwa cyenda 2017, abantu bateye mu rugo kwa depite Tundu Lissu wa Chadema, baramurasa arakomereka cyane, naho mu kwezi kwa kabili gushize, abayobozi b’inzego z’ibanze za Chadema bishwe n’abantu bataramenyekana. Chadema ivuga ko byose ari ubwicanyi bwa politiki.

Facebook Forum

XS
SM
MD
LG