Perezida wa Reta Zunze Ubumwe z'Amerika, Donald Trump yatangaje ko ibihugu vya Mexique na Canada bishobora kuvanwa ku rutonde rw’ibihugu bizotegerezwa kuriha amatagisi kuri “acier’ na “aluminium” Amerika igurira muri ivyo bihugu. Ivyo mu gihe Amerika yoshika ku masezerano ashimishije mu vy’ubudandaji n’ivyo bihugu.
Amerika, Canada na Mexique biriko biraganira mur'iki gihe ku vyerekeye gusubiramwo amasezerano y’uguhanahana ibidandazwa ata ntambamyi. Ivyo biganiro biriko bibera ku murwa mukuru wa Mexique, Mexico City.
Prezida Trump yatangaje kur'uyu wa mbere ko ayo masezerano amaze imyaka 24 yabaye amasezerano mabi kuri Amerika. Atangaza ko amashirahamwe n’ubuzi vyimukiye muri Canada na Mexique bivuye muri Amerika.
Umugambi Perezida Trump afise wo gutangisha amatagisi kuri, Acier na Aluminium bivuye mu mahanga bizogeramira n’ibindi bihugu bicuditse na Amerika, nk’Ubwongereza, Ubudagi, Koreya y’epfo, Turukiya n’Ubuyapani.
Ido n’ido ku vyerekeye uwo mugambi bizoherahezwa mu mpera z’iyi ndwi canke mu ntango z’indwi itaha.
Facebook Forum