Uko wahagera

Biteganijwe ko perezida wa Leta zunze ubumwe z’Amerika, Donald Trump, atangaza ingamba nshya yafatiye Irani. Nk’uko ibiro bye White House ibivuga, yabanje kuganira n’abajyanama be mu by’umutekano, barimo minisitiri w’ububanyi n’amahanga Rex Tillerson, minisitiri w’ingabo Jim Mattis, n’umugaba mukuru w’ingabo, General Joseph Dunford.

Mu kiganiro Tillerson yagiranye n’abanyamakuru mbere y’iri jambo, yasobanuye ko, ku birebana n’amasezerano yo mu 2015 kuri gahunda ya nucleaire ya Irani n’ibihugu bitandatu by’ibihangange (amasezerano bita P5+1), Perezida Trump atazongera kubwira inteko ishinga amategeko, Congress, niba Irani yubahiriza aya masezerano cyangwa niba itayubahiriza. Iyi ngingo iteganijwe mu itegeko ryitwa INARA (Iran Nuclear Agreement Review Act). INARA rivuga kandi ko Congress, ifite uburenganzira bwo gusubira mu masezerano P5+1.

Minisitiri Tillerson yasobanuye ko Perezida Trump yifuza ko itegeko INARA rivugururwa. Ariko yemeza ko Leta zunze ubumwe z’Amerika itavuye muri P5+1, amasezerano azwi mu izina rya JCPOA (Joint Comprehensive Plan of Action).

Yavuze, ati: “Dukwiye kuvugurura INARA kugirango dushyiremo ingingo zikaze, zateganya ko Irani iramutse itubahirije inshingano zayo, ibihano bihita byongera gushyirwa mu bikorwa ako kanya nta zinzi mpaka.” Izi ngingo, nk’uko Tillerson yabivuze, ntizigomba kwibanda kuri gahunda ya nucleaire yonyine gusa. Zigomba no kureba iby’intwaro za misili (missiles) za Irani.

Perezida Trump ahora avuga ko aya masezerano ari mabi cyane ku gihugu cye, kandi ko Irani itayubahiriza. Ibindi bihugu bitanu biyarimo, ari byo Uburusiya, Ubushinwa, Ubwongereza, Ubufaransa, n’Ubudage, bo bashaka ko aya masezerano agumaho.

Muri uru rwego, ministiri w’intebe w’Ubwongereza, Theresa May, yahamagaye Perezida Trump kuri telefoni muri iki cyumweru, amusaba gutekereza neza ku ngaruka zo kuva muri aya masezerano. May yemeza ko byagira ingaruka zikomeye ku mutekano w’isi. Minisitiri w’ububanyi n’amahanga we, Boris Johnson, nawe yahamagaye mugenzi we wa Leta zunze ubumwe z’Amerika, Rex Tillerson, nawe amubwira ko kuguma mu masezerano bituma isi igira amahoro.

Mu byo amasezerano ateganya, harimo ko Irani itazigera ikora intwaro kirimbuzi.

Amasezerano yemerera kandi Irani gusubizwa umutungo wayo wafatiriwe n’amahanga mu rwego rw’ibihano by’Umuryango w’Abibumbye, umutungo ugera mu madolari y’Abanyamerika miliyari ijana.

N’ubwo amasezerano P5+1 adakozweho, minisitiri Tillerson yavuze ko Perezida Trump ateganya gutangaza ibihano bishya ku mutwe w’igisilikali wa Irani ukomeye wihariye witwa Iran’s Revolutionary Guards, ushinzwe kurengera revolisiyo ya Irani. Leta zunze ubumwe z’Amerika irega uyu mutwe gutera inkunga iterabwoba mu karere k’Uburasirazuba bwo hagati.

Facebook Forum

XS
SM
MD
LG