Umukuru w’Inama Nshingamateka ya Etiyopiya Yatanze Imihoho

Umukuru w’inama nshingamateka muri Etiyopiya, Abadula Gemeda kur’uyu w’Imana yaratangaje ko atanze imihoho, ku mpamvu atashikirije.

Abadula Gemeda yari mur’ico kibanza kuva mu mwaka w’ 2010, imbere y’aho yari umushikiranganji wo kwivuna abansi kandi akaba n’umukuru w’intara ya Oromo ibamwo abantu benshi mur’ico gihugu.

Yatangaje ko agiye kubandanya ar'umushingamateka aserukira ishirahamwe riharanira demokarasi y’abanyagihugu mu ntara ya Oroma kandi azoshikiriza igitumye atanze imihoho inama nshingamateka niyavyemeza.

Inama nshingamateka ya Etiyopiya itegekanya gukorana kur’uyu wa mbere aho ishobora kwemeza iryo tanga imihoho kwiwe iteko itore uwumusubirira.