Uko wahagera

Imvura Idasanzwe Yahitanye Abantu 23 Muri Niger


Guverinoma ya Perezida Mahamadou Issoufou ku bufatanye n’umuryango w’abibumbye, bashizeho ikigega cyo kugoboka abakuwe mu byabo n’iyi mvura

Abantu 23 nibo bamaze guhitanwa n’imvura idasanzwe yibasiye igihugu cya Niger, ubusanzwe kigizwe n’igice kinini cy’ubutayu.

Nkuko bitangazwa n’umuryango w’abibumbye, imiryango isaga 2,400 niyo imaze kuvanwa mu byayo n’imyuzure yatewe n’iyi mvura, yayogoje igihugu kuva mu kwezi gushize kwa gatandatu.

Umuryango w’abibumbye utangaza ko usibye aba bitabye Imana, amatungo arenga 4,000 nayo yishwe n’imyuzure mu gace ka Tahoua, gaherereye mu burengerazuba bw’iki gihugu.

Kugeza ubu ntiharabarurwa umubare nyawo w’ibyangijwe n’iyi mvura yibasiye uduce tw’uburengerazuba, amajyaruguru no mu murwa mukuru Niamey.

Si ubwa mbere Niger yibasirwa n’ikiza nkiki, kuko mu mwaka ushize w’2016, nabwo imvura idasanzwe yahitanye abantu 50 naho abagera ku 145,000 bakurwa mu byabo.

Kugeza ubu igihugu cya Niger, ku bufatanye n’umuryango w’abibumbye, bashizeho ikigega cyo kugoboka abakuwe mu byabo n’iyi mvura. Iki kigega kimaze gukusanya amafranga asaga 6,500,000 z’amadorali y’Amerika.

Facebook Forum

XS
SM
MD
LG