Muri Nijeriya, abiyahuzi bateze bombe, ihitana abantu 17 barenga, mu majyaruguru ashyira uburasirazuba bw’igihugu. Abandi barenga 20 bakomeretse. Amakuru yatangajwe na polise kuri uyu wa gatatu arabyemeza.
Abiyahuzi bane bagabye ibitero bya bombe mu mujyi wa Maiduguri mu ijoro ryo kuwa kabiri abantu barenga 20 barakomereka. Abenshi ni abarwanyi b’abasivili bari barinze umutekano nk’uko polise yo mu karere ibitangaza.
Byibura umwe mu biyahuzi b’ejo kuwa kabiri, yari umugore. Ibi umuvugizi w’abaturage barinda umutekano wabo yabitangarije abanyamakuru. Boko Haram yagiye irushaho gukoresha abagore n’abana b’abakobwa mu kugaba ibitero by’iterabwoba mu masoko no kuri za bariyeri.
Maiduguri, umurwa mukuru wa leta ya Borno, niho Boko Haram yatangiriye ibitero byayo by’inyeshyamba bimaze imyaka umunani. Uwo mutwe wishe abantu barenga 20,000 kandi wakuye mu byabo ababarirwa muri miliyoni 2 n’ibihumbi 700. Boko Haram ishaka gushyiraho Leta ya Kiyisilamu.
Facebook Forum