Uko wahagera

Trump Ashimishijwe Nuko Umujyi wa Mosul Wabohowe


Abanya-Iraki bishimira kubohorwa k'umujyi wa Mosul

Perezida Donald Trump wa Leta zunze ubumwe z’Amerika yashimiye Ministiri w’Intebe wa Iraki n’ingabo z’icyo gihugu kuba barabohoje umujyi wa Mosul wafatwaga nk’icicaro gikomeye cy’umutwe wa Leta ya Kiyisilamu.

Mu itangazo ryasohowe n’ibiro by’umukuru w’igihugu, Trump avuga ko kuba uwo mutwe watsinzwe ari ikimenyetso cy’uko imisi yawo muri Iraki na Syria ibaze.

Perezida Trump yagaragaje ko azakomeza gushyigikira ibikorwa bigamije gusenya burundu umutwe w’iterabwoba wa Leta ya Kiyisilamu. Muri iryo tangazo yanagaragaje ko yifatanyije mu kababaro n’imiryango y’abanya-iraki batakaje ubuzima bwabo mu ntambara yo kwigarurira umujyi wa Mosul.

Kuri uyu wa mbere nibwo Ministiri w’intebe wa Iraki Haider al-Abadi yatangaje ku mugaragaro itsinzi yo kwigarurira umujyi wa Mosul. Mu ijambo yavugiye kuri televisiyo y’igihugu Abadi yavuze ko batsinze ikinyoma, igitugu n’iterabwoba.

Yongeyeho ko inzira ikiri ndende yo kurandura burundu imitwe y’iterabwoba no kugarura amahoro n’ituze mu gihugu.

Umujyi wa Mosul wabaye indaro y’umutwe wa Leta ya Kiyisilamu kuva muri 2014. Raporo y’umuryango uharanira uburenganzira bwa muntu Human Rights Watch ivuga ko abasivili 400 bazize iyo ntambara hagati y’ukwezi kwa mbere n’ukwezi kwa gatanu.

Facebook Forum

XS
SM
MD
LG