Uko wahagera

Abantu bo mu bihugu 6 by'Abayisilamu n'impunzi zose ubu bahanzwe n'amategeko akomeye ababuza kwinjira muri Amerika kuva aho amategeko ya Perezida Trump yateye impagarara nyinshi yemerejwe n’urukiko rukuru by’agateganyo.

Ibyo bisobanura ko abantu badafitanye ubucuti bwa hafi n'abasanzwe baba muri Amerika cyangwa abadafitanye ubucuti bw'ubucuruzi na Amerika bashobora kudahabwa uburenganzira bwo kwinjira muri icyo gihugu.

Iryo tegeko rireba abaturage bo mu bihugu bya Iran, Syria, Somalia, Sudan na Yemen hamwe n'impunzi zose.

Umwanya muto mbere y'uko iryo tegeko ritangira gukurikizwa, byamenyekanye ko abantu bo mu ntara ya Hawaii babajije umunyamategeko umwe wo muri iyo ntara gusobanuza neza ibyerekeye iryo tegeko.

Iyo ntara yari yaneguye cyane reta ya Amerika ko irenga ku mategeko y’urukiko rukuru mu gukumira abantu.

Mu ntangiriro z’iki cyumweru, urukiko rukuru rwemeje iryo tegeko by’agateganyo, ingingo ihise ihagarika icyemezo cyari cyafashwe n’urukiko cyo guhagarika iryo tegeko rya Trump.

Urukiko rwafashe icyemezo ko abantu basaba uburenganzira bwo kwinjira muri Amerika bava mu bihugu bitandatu by'Abayisilamu hamwe n'impunzi zose, bagomba kwerekana ko bafite icyo bapfana cya bugufi n'abaturage ba Amerika.

Byitezwe ko urukiko rukuru rufata icyemezo cya nyuma cyerekeye uko kubuza abantu kwinjira hano muri Amerika mu kwezi kwa cumi.

Ufatiye kuri iryo tegeko rishya, mu gihe cy’iminsi 90 iri imbere, abantu bava muri ibyo bihugu bitandatu by'Abayisilamu badafitanye ubucuti n'ababayo bwa hafi, ntibazahabwa uburenganzira bwo kwinjira muri icyo gihugu.

Abazemererwa ni abafite inaha ababyeyi babo, abagore, abagabo, abana b'abakobwa cyangwa b'abahungu. N'abadafitanye ubucuti bw'ubucuruzi cyangwa abanyeshuri nta burenganzira bafite bwo kwinjira muri iki gihugu.

Facebook Forum

XS
SM
MD
LG