Uko wahagera

Karzai aramagana igisasu cy’Amerika


Igisasu Amerika yise igisasu “Nyina w’ibisasu byose gifite uburemere bw’ibilo 10,000

Leta y’Afghanistani yatangaje uyu munsi ko igisasu cy’Amerika cyahitanye abarwanyi 36 b’umutwe wa Leta ya kiyisilamu. Itangazo rya minisiteri y’ingabo z’Afghanistani riremeza ko nta musivili n’umwe iki gisasu cyishe.

Ibiro bya perezida w’Afghanistani, Ashraf Ghani, byo byatangaje ko Amerika yarashe ifatanije n’inzego z’umutekano w’igihugu cye.

Icyo gisasu Amerika yise igisasu “Nyina w’ibisasu byose" gifite uburemere bw’ibilo 10,000. Yakirashe ejo kuwa kane ku birindiro bya Leta ya kiyisilamu biri mu buvumo, mu ntara ya Nangarhar, mu burasirazuba bw’amajyaruguru bw’Afghanistani.

Ni ubwa mbere iki gisasu gikoreshejwe mu ntambara.

Gusa rero, abany’Afghanistani bose ntibakivugaho rumwe. Perezida wacyuye igihe, Hamid Karzai, yacyamaganiye kure n’imbaraga nyinshi.

Mu butumwa yanyujije ku mbuga nkoranyambaga Twitter, yanditse ngo “Iyi si intambara ku iterabwoba. Ahubwo Amerika irakoresha igihugu cyacu kugirango ikore igerageza ry’intwaro z’ishyano. Abany’Afghanistani twese tugomba guhagarika ibi bikorwa by’Amerika.”

Abatalibani bo muri Afghanistani nabo banditse itangazo bamagana igisasu cy’Amerika, kandi bemeza ko aho cyarashwe nta Leta ya kiyisilamu iharangwa. Nabo bavuga ko “Leta zunze ubumwe z’Amerika ikoresha ubutaka bw’Afghanistani kugirango ikore igerageza ry’intwaro zayo.”

Facebook Forum

XS
SM
MD
LG