Muri Kenya, urukiko rw’ubujurire rwategetse ko abayobozi barindwi b’imyigaragambyo y’abaganga bafungurwa. Kur'uyu wa mbere itariki 13 z'ukwezi kwa kabiri 2017, urukiko rw’ibanze rwari rwabakatiye igifungo cy’ukwezi, kubera kwanga guhagarika imyigaragambyo.
Urukiko rwategetse ko imishyikirano ikomeza hagati ya leta n’abaganga, kandi abahuza, ari bo Urugaga rwa ba Avoka ba Kenya na Komisiyo y’igihugu y’uburenganzira bwa muntu, barushyikiriza mu cyumweru gitaha imyanzuro y’ibiganiro, bishobora gusubukurwa kur'uyu wa kane.
Abaganga bakora mu bitaro bya leta muri Kenya bamaze amezi abili mu myigaragambyo yo guhagarika akazi. Barasaba ko imishahara yabo izamurwa ku rugero rwa 300%.
Abaganga bakora mu bitaro byigenga nabo bafashe icyemezo cyo kwifatanya nabo, nabo bahagarika akazi rimwe mu cyumweru buri wa kane.